O‘zbekiston musulmonlari idorasi so‘nggi vaqtlarda Isroil va Falastin o‘rtasidagi vaziyat keskinlashuvi yuzasidan rasmiy bayonot berdi.
Ma’lum qilinishicha, shu kunlarda O‘zbekiston musulmonlari idorasi Sharqiy Quddusda notinchliklar davom etayotganidan jiddiy tashvishda.
“Jahon hamjamiyati Falastin—Isroil muammosini xalqaro huquq normalariga muvofiq, tinch yo‘l bilan hal etilishi zarurligini bot-bot ta’kidlamoqda. Zero, Islom dini – avvalo, tinchlik va do‘stlikka, ahillik va birdamlikka hamda bag‘rikenglikka da’vat etadi”, — deyiladi munosabatda.
Shuningdek, ta’kidlanishicha, Masjidul Aqso Islom dinining shior makonlaridan biri, ikki qiblaning birinchisi, uchta asosiy masjidlar sirasidan, musulmonlarga tegishli muborak maskan. O‘z navbatida ushbu mintaqada boshqa din vakillari uchun ham tabarruk hisoblangan ziyoratgohlar mavjud.
“Zero, Islom dini insonlarga ozor berishdan qaytaradi. Nafaqat inson zotiga, balki chumoliga ham ozor berish, hattoki, aziyat beruvchi biror so‘z aytishdan ham qaytaradi.
O‘zbekiston musulmonlari idorasi hozirgi qaltis vaziyatda davlatlar, millatlar va elatlar o‘rtasidagi nizolarni tinch yo‘l bilan hal etish eng to‘g‘ri yo‘l, deb hisoblaydi. Ayni vaqtda, mo‘min-musulmonlarni mavjud voqelikni Quddusdagi vaziyat bilan bog‘lagan holda noo‘rin bahs-munozaralar, ixtilof va tushunmovchiliklar keltirib chiqarishga, noto‘g‘ri xatti-harakatlarga da’vat qilayotgan fitnalardan ehtiyot bo‘lishga chaqiramiz.
Ta’kidlash joizki, Sharqiy Quddusdagi notinch vaziyat barchamizning dillarimizni og‘ritdi, ruhoniyatimizni mahzun qildi. Bunday paytlarda mo‘minning mo‘mindagi haqqi duo qilishdir. Zero, duo najot va qalqondir. Yaratgan Parvardigordan iltijo qilib so‘raymizki, butun dunyo, xususan, musulmon olamida tinchlik va ofiyatni barqaror etsin, Yer yuzidagi barcha mo‘min-musulmonlarga omonlik, nusrat va qalblariga sakinat ato etsin”, — deya qayd etiladi bayonotda.
Ma’lumot uchun, Falastin—Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.
Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin guruh raketalar otishni boshladi. Bunga javoban Isroil G‘azo sektorini o‘qqa tutdi.
17-may holatiga, Isroil tomonidan o‘n kishi, Falastin tomonidan — 200 dan ortiq odam halok bo‘lgan. 15-may kuni HAMAS Isroil hukumati arab aholisini o‘z uylaridan ko‘chirib yuborish haqidagi qarorini bekor qilib, qo‘lga olingan namoyishchilarni ozod etsagina, o‘t ochishni to‘xtatishini ma’lum qildi.
Izoh (0)