O‘zbekistonda oiladagi ajrimlarning 40,4 foizi moddiy muammolar sabab yuzaga kelmoqda. Bu haqda “Ijtimoiy fikr” respublika jamoatchilik fikrini o‘rganish markazi tomonidan o‘tkazilgan sotsiologik tadqiqotga tayanib, O‘zA xabar berdi.
Telefon orqali o‘tkazilgan so‘rovlarda respublikaning barcha hududlari, shahar va qishloq joylarida yashovchi, turli soha va tarmoqlarda band bo‘lgan 18 va undan katta yoshdagi fuqarolar ishtirok etgan.
So‘rov globallashuv va ommaviy madaniyat oila instituti barqarorligi pasayishining omili ekanini aniqlab bergan (24,0 foiz). Ular ommaviy axborot vositalari va ijtimoiy tarmoqlar orqali yoshlarning dunyoqarashiga, qadriyatlari va qarashlariga ta’sir ko‘rsatadi, barqaror oila qurish qobiliyatini pasaytiradi.
So‘rov natijalariga ko‘ra, 45 yoshdan katta respondentlarning aksariyati ota-onalarning yosh oilaning hayotiga aralashuvi uning mustahkam bo‘lishiga yordam beradi, degan fikrga qo‘shiladi. Bo‘y yetgan farzandlarning ota-onalari bo‘lgan fuqarolar oilaning ichki hayotiga aralashishi joiz, bu yosh er-xotinga xatolarga yo‘l qo‘ymaslikka va farzandlar nikohining mustahkam bo‘lishiga yordam beradi, deb hisoblaydi. Yoshlarning kattagina qismi qarama-qarshi fikrda: 18—24 yoshdagi har ikkinchi respondentning fikricha (50 foiz), ota-onalarning aralashuvi salbiy omil hisoblanadi, oilaning mustahkamligiga putur yetkazadi va er-xotin o‘rtasidagi mojarolarga olib keladi. 20,9 foiz so‘rov ishtirokchilarining fikriga ko‘ra, bunday aralashuv – oilaviy ajrimlarning keng tarqalgan sababi hisoblanadi.
So‘rov oiladagi ajrimlarning eng keng tarqalgan sabablarini aniqlab berdi: er-xotin fe’l-atvorlarining mos kelmasligi (41,2 foiz) va oiladagi moddiy muammolar (40,4 foiz).
Bepushtlik – 12,6 foiz respondentlarning fikriga ko‘ra, nikoh buzilishining eng keng tarqalgan sabablaridan biri hisoblanadi. Farzand ko‘rolmaslik – bu oila uchun jiddiy muammo va farzand ko‘rishga intilayotgan turmush o‘rtog‘i, erkak va ayol, agar oilada uzoq vaqt mobaynida farzand bo‘lmasa, ajrashish uchun ariza berishi mumkin.
Ma’lumot uchun, O‘zbekistonda 2021-yilning yanvar—mart oylarida 9213 ta ajrim holati qayd etilgan.
Izoh (0)