O‘zbekistonda 9-may kuniga bag‘ishlangan tadbirlar karantin qoidalariga qat’iy rioya etilgan holda o‘tkazish nazorat qilinadi. Bu haqda Respublika maxsus komissiyasi axborot berdi.

“Mamlakatimizda koronavirus infeksiyasini yuqtirish bo‘yicha kunlik ko‘rsatkich aprel oyining ikkinchi yarmidan boshlab 300 dan oshgan bo‘lsa, ushbu ko‘rsatkich 2021-yil 6-may holatiga 450 dan oshgani ham fuqarolarimiz tomonidan karantin cheklovlariga amal qilish mas’uliyatini yanada oshirishni taqozo etmoqda.

Shu munosabat bilan aholi salomatligini saqlash, mamlakatda epidemiologik vaziyat keskinlashuviga yo‘l qo‘ymaslik maqsadida yurtimizda 9-may — Xotira va qadrlash bayrami bilan bog‘liq ommaviy tadbirlarni faqatgina O‘zbekiston Prezidentining 2021-yil 20-apreldagi PQ–5081-son qarori bilan tasdiqlangan 9-may — Xotira va qadrlash kuni, umumxalq bayramiga bag‘ishlangan tadbirlarga tayyorgarlik ko‘rish va ularni o‘tkazish dasturi doirasida karantin talablariga qat’iy rioya etgan holda amalga oshirish zarur”, – deyiladi komissiya axborotida.

Shuningdek, yuqoridagi dasturda nazarda tutilmagan boshqa har qanday ommaviy tadbirlarni o‘tkazish taqiqlanadi. Ushbu karantin chekloviga rioya etilishi Qoraqalpog‘iston Vazirlar Kengashi va mahalliy hokimliklar, Milliy gvardiya, ichki ishlar organlari va boshqa mutasaddi tashkilotlar tomonidan nazorat qilinadi.

Bundan avval Shavkat Mirziyoyev 9-may – Xotira va qadrlash kuniga tayyorgarlik ko‘rish bo‘yicha qarorni imzolagani, O‘zbekistonda Ikkinchi jahon urushi qatnashchilari va nogironlariga 12 mln so‘m miqdorida bir martalik pul mukofoti berilishi, Ikkinchi jahon urushi vaqtida bedarak yo‘qolgan o‘zbek askarining xoki vatanga olib kelingani hamda Toshkentda “Bessmertniy polk” aksiyasini o‘tkazishga ruxsat berilgani haqidagi xabarlar rasman rad etilgani haqida xabar berilgandi.