Qarshining “Nasaf” futbol klubi hakamlarni o‘z tomoniga moddiy manfaatdorlik evaziga og‘dirishga uringani uchun O‘zbekiston futbol assosiatsiyasi tomonidan (O‘FA) jarimaga tortildi.

Foto: “Nasaf”

O‘FA matbuot xizmatining ma’lum qilishicha, “Nasaf” vakili 2020-yil futbol mavsumida hakamlarni o‘z tomoniga moddiy manfaatdorlik evaziga og‘dirishga uringani uchun klub tashkilot intizom kodeksining 5.26 bandiga muvofiq 50 million so‘m jarimaga tortilgan.

Qayd etilishicha, mazkur qaror O‘FA tomonidan rasmiy tarzda e’lon qilingan kundan boshlab kuchga kiradi.

Avvalroq o‘zbekistonlik FIFA referisi Sherzod Qosimov bir qator futbol uchrashuvlarida bellashuvga yoki uning natijasiga ta’sir o‘tkazish maqsadida kelishuvlarda qatnashgani uchun (intizom kodeksining 5.44 bandiga asosan) uch yil muddatga futbolga oid har qanday faoliyatdan chetlatilgandi.

Eslatib o‘tamiz, bungacha O‘FA Etika qo‘mitasi 2020-yilning noyabr oyida yuqoridagi bandga ko‘ra, bir qator hakamlarga jazo choralarini qo‘llagandi. Xususan, FIFA, OFK hakami Jasur Muxtorov 5 yilga, O‘FA hakami Temur To‘xtasinov bir yilga va O‘FA hakami Asker Najafaliyev esa 2020-yilgi mavsum oxirigacha futbolga oid faoliyatdan chetlatilgandi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!