O‘zbekiston va Rossiya o‘rtasida imzolangan 2025-yilgacha harbiy sohada strategik hamkorlik dasturi imzolanishi munosabati bilan bildirilayotgan barcha xavotirlar “mutlaqo asossiz va mantiqiy asoslarga ega emas”. Bu haqda Mudofaa vazirligiga tayanib, “Gazeta.uz” xabar berdi. Dastur Rossiya mudofaa vaziri Sergey Shoyguning 27−28-aprel kunlari O‘zbekistonga tashrifi doirasida imzolangan edi.
“Mudofaa sohasida O‘zbekiston Respublikasi Konstitutsiyasi (1992-yildagi), Tashqi siyosat konsepsiyasi (2012-yildagi), Mudofaa doktrinasi (2018-yildagi) singari asosiy hujjatlarda mazkur savollarga aniq va tiniq javoblar mavjud”, — deyiladi vazirlik bayonotida.
O‘zbekiston Mudofaa doktrinasining 10-bandida “O‘zbekistonning mudofaa sohasidagi siyosati quyidagi prinsiplarga asoslangan: o‘z hududida chet el harbiy bazalari va obyektlarining joylashtirilishiga yo‘l qo‘ymaslik; Qurolli Kuchlarning xorijdagi tinchlik o‘rnatish bilan bog‘liq operatsiyalarda va harbiy mojarolarda ishtirok etmasligi”, — deyilgan.
“Shu munosabat bilan Rossiya qo‘shinlarining O‘zbekistonga ehtimoliy kiritilishi, shuningdek, O‘zbekistonning Rossiya harbiy mojarolariga aralashuvi to‘g‘risidagi mish-mishlar asossiz hisoblanadi”, — deya qayd etdi Mudofaa vazirligi.
O‘zbekistonning Rossiya bilan ham, Yevropa, Markaziy va Janubiy Osiyo, AQSh bilan ham hamkorligi “ishonch, tenglik, o‘zaro hurmat va manfaatlarni hisobga olish tamoyillari asosida qurilgan”, — deyiladi bayonotda.
O‘zbekiston va Rossiya mudofaa vazirliklari o‘rtasida kengaytirilgan me’yoriy-huquqiy baza yaratilgan bo‘lib, bu qurolli kuchlar faoliyatining turli yo‘nalishlarida hamkorlikni olib borish va faollashtirishga imkon beradi. Bunday hamkorlikning asosini, avvalambor, 2004-yil 16-iyuldagi mamlakatlar o‘rtasidagi strategik sheriklik to‘g‘risidagi bitim va 2005-yil 14-noyabrdagi Ittifoqchilik munosabatlari to‘g‘risidagi bitim tashkil etadi, deya qayd etilgan.
“Ochiq va ro‘yirost tan olish kerakki, bugungi kunda Rossiya O‘zbekiston aholisining osiyishta hayoti, shuningdek, mintaqada tinchlik va barqarorlikni ta’minlash maqsadida O‘zbekiston Qurolli Kuchlariga qurol va harbiy texnika yetkazib berishda eng yirik sherik bo‘lib qolmoqda.
Ikki davlat mudofaa vazirliklari o‘rtasida ushbu sohada yaqin hamkorlik o‘rnatilishi O‘zbekiston tashqi siyosatining mantiqiy davomidir, ushbu hamkorlikning Rossiya bilan O‘zbekiston uchun turli xil oqibatlari to‘g‘risidagi g‘arazli mish-mishlar asossiz”, — deya xulosa qildi Mudofaa vazirligi.
Izoh (0)