Qirg‘iziston prezidenti Sadir Japarov aprel oyidagi referendum natijalari bo‘yicha qabul qilingan tuzatishlarni inobatga olgan holda mamlakat konstitutsiyasining yangi tahririni imzoladi. Bu haqda prezident veb-saytiga tayanib, “RBK” xabar berdi.
“Qirg‘iziston Respublikasi prezidenti Sadir Japarov bugun, 5-may kuni 2021 yil 11-aprelda bo‘lib o‘tgan referendum (ommaviy ovoz berish) natijasida qabul qilingan Qirg‘iziston Respublikasi konstitutsiyasini imzoladi”, — deyiladi xabarda.
Qirg‘iziston konstitutsiyasiga kiritilgan o‘zgartishlar hukumat rahbarining vazifalarini prezident apparati rahbariga yuklaydi. Shuningdek, Qirg‘iziston prezidenti vazirlarni tayinlash va lavozimidan ozod qilish imkoniyatiga ega bo‘ladi. Bundan tashqari, parlamentdagi deputatlar soni 120 kishidan 90 kishiga qisqartiriladi.
1993-yilda qabul qilingan Qirg‘iziston konstitutsiyasiga hozirgacha o‘n marta o‘zgartirish kiritildi. So‘nggi marta bosh qonun 2016-yilda o‘zgartirilgan, o‘shanda bosh vazir va parlament vakolatlari kuchaytirilgan edi. Qirg‘iziston konstitutsiyasini bu safargi qayta yozib chiqish Sadir Japarovning tashabbusi hisoblanadi.
Izoh (0)