Vazirlar Mahkamasining qarori bilan Olimjon To‘ychiyev Innovatsion rivojlanish vazirligi huzuridagi Innovatsiyalarni joriy qilish va texnologiyalar transferining milliy ofisi bosh direktori etib tayinlandi. Bu haqda Telegram’dagi “Huquqiy axborot” kanali xabar berdi.

Foto: Innovatsion rivojlanish vazirligi

Olimjon To‘ychiyev 1991-yil Toshkent viloyati Bekobod shahrida tug‘ilgan. Toshkent shahridagi Turin politexnika universitetida 2015-yil mashinasozlik muhandisi mutaxassisligi bo‘yicha bakalavr darajasi va 2017-yili Mexatronika yo‘nalishi bo‘yicha magistrlik darajasiga ega bo‘lgan. Olimjon To‘ychiyev 2016—2017-yillarda Germaniyaning Xoffenxaym universitetida ham tahsil olgan.

Shuningdek, u 2013-yil ovoz orqali masofadan boshqarilib, turli topshiriqlarni bajaradigan, o‘zbek tilini tushunadigan birinchi robotni yaratib, fan va texnika sohasida, ayniqsa, robototexnika sohasini yoshlar o‘rtasida keng ko‘lamda ommalashtirish yo‘lida qo‘shgan hissasi uchun “Shuhrat” medali bilan taqdirlangan.

2017-yil Olimjon To‘ychiyev “Kamolot” YoIH qurultoyida O‘zbekiston Prezidenti tomonidan Fan va texnologiyalar agentligi bosh direktorining o‘rinbosari etib tayinlangan edi.  30 yoshli To‘ychiyev 2019-yil noyabridan beri innovatsion rivojlanish vazirining o‘rinbosari sifatida faoliyat olib borayotgani va aprel oxirida ishdan olingani to‘g‘risida xabar berilgandi.