Toshkent markazida LGBT vakillari deb o‘ylab, yosh yigit va qizni kaltaklashda ayblanayotganlarning 4 nafari uy qamog‘iga olindi

Toshkent markazidagi Amir Temur maydonida LGBT harakatiga qarshi yig‘ilib, o‘sha yerdan o‘tib ketayotgan yosh yigit va qizni harakat vakili deb o‘ylab, kaltaklagan shaxslar ushlanib, holat yuzasidan jinoyat ishi qo‘zg‘atilgandi. Poytaxt IIBB matbuot xizmati ularni kaltaklashda ayblanayotganlarning 4 nafari uy qamog‘iga olinganini ma’lum qildi.

Eslatib o‘tamiz, 25-mart kuni Toshkent markazida LGBT faollariga qarshi namoyish bo‘lib o‘tgandi. O‘nlab erkaklar Forumlar saroyi qarshisida yo‘lning harakat qismida yurib, “Allohu akbar!” deb takbir aytgan. Ularning 2-3 nafari o‘sha yerdan o‘tib ketayotgan yosh yigit va qizni LGBT faollari deb gumonlab, ularga tan jarohatlari yetkazgan. Ularga yana 20-25 nafar shaxslar qo‘shilib, bezorilik harakatlarini davom ettirishgan.

Dastlab janjalni boshlagan 12 nafar fuqaro ushlangan. Holat yuzasidan Toshkent shahar IIBB Tergov boshqarmasi tomonidan Jinoyat kodeksining 277-moddasi 2-qismi “b” bandi (“Bezorilik, bir guruh shaxslar tomonidan sodir etilishi”) alomatlari bilan jinoyat ishi qo‘zg‘atilgan.

Xabarda aytilishicha, tergov davomida hodisada bevosita ishtirok etgan shaxslar aniqlanib (31 nafar), ularning har birining harakatiga huquqiy baho berildi.

Ulardan to‘rt nafari jinoyat ishida ayblanuvchi tariqasida jalb qilindi. Bular: Toshkent viloyatida tug‘ilgan 1989-yilda tug‘ilgan Q.F. va 1991-yilda tug‘ilgan Y.M., shuningdek poytaxtda istiqomat qiluvchi 1993-yilda tug‘ilgan F.B. hamda 2002-yilda tug‘ilgan A.R.

Tergov davomida aniqlanishicha, aynan ular yosh yigit va qizga yengil tan jarohati yetkazgan. Ayblanuvchilarga nisbatan uy qamog‘i tarzidagi ehtiyot chorasi tanlandi. Dastlabki tergov tugagandan so‘ng jinoyat ishi qonuniy qaror qabul qilinishi uchun sudga taqdim etiladi.

Mojaroda ishtirok etgan qolgan 27 nafar shaxslarning xatti-harakatlarida Ma’muriy javobgarlik to‘g‘risidagi kodeksning 183-moddasi (“mayda bezorilik”), 194-moddasi (“ichki ishlar organlari xodimining qonuniy talablarini bajarmaslik”), 195-moddasi (“ichki ishlar organlari xodimlarining o‘z xizmat burchlarini bajarishlariga qarshilik ko‘rsatish”) va 201-moddasida (“yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish”) nazarda tutilgan huquqbuzarlik alomatlari mavjud.