Sinfdoshlarining kalaka qilishi, ustidan kulishi va shunga o‘xshash holatlar yulduzlarning maktab davrini esga olishni istamasligiga sabab bo‘lgan.

Viktoriya Bekxem

Foto: “Liza”

Viktoriyaning badavlat oilada tug‘ilib, voyaga yetgani maktabdagilar uni yomon ko‘rishi, hasad qilishiga sabab bo‘lgan. U vaqtda o‘zini yolg‘iz his qilgani sabab ham Bekxem xonim maktabi haqida umuman eslashni xohlamaydi. U tengqurlari ko‘rmasligi uchun maktabdan ancha uzoq joyda mashinadan tushishga majbur bo‘lgan. Bugungi kunda sevimli rafiqa va mashhur dizayner sifatida o‘z o‘rnini topgan Viktoriya farzandlariga ijtimoiy kelib chiqishidan qat’i nazar, barchaga birdek yaxshi munosabatda bo‘lish kerakligini ta’kidlaydi.

Anjelina Joli

Foto: “Liza”

Anjelina bolaligida boshqalarga o‘xshamagan qiz bo‘lgan. Ko‘p hollarda boshdan-oyoq qora kiyinib, o‘lim haqida gapirgan Anjelinaning sinfdoshlari uni g‘alati hisoblab, maxsus maktabga o‘tib ketishga majburlagan. Aktrisa maktab yillari haqida gap ketganda, hamma unga bosim qilgani va uni yoqimsiz deb bilganini ma’lum qilgan.

Keyt Uinslet

Foto: “Liza”

Tengdoshlari Keytni xunuk hisoblab, unga ozishi kerakligini aytishdan charchamagan. 15 yoshida vazni 80 bo‘lgan aktrisaning sinfdoshlari unga hatto qo‘l ko‘targan. Bu voqealardan keyin u maktabdan ketishiga to‘g‘ri kelgan. Shunga qaramay Keyt o‘zi uchun sevimli bo‘lgan aktrisalik bilan shug‘ullanib, nafaqat kino olami, balki hayotda ham o‘z o‘rnini topishga muvaffaq bo‘lgan.

Tom Kruz

Foto: “Liza”

Tom maktab yillarida disleksiyadan aziyat chekkan — u yozish va o‘qishga qiynalgan. Shu sabab sinfdoshlari uni qoloq deb atagan. Kruz bergan intervyularida uning bitta ham do‘sti bo‘lmagani, unga ko‘p bor zo‘ravonlik qilingani va har safar shu holat kuzatilganda yuragi qinidan chiqib ketadigandek his qilganini ta’kidlagan.

Tilda Suinton

Foto: “Liza”

Badavlat oqsuyaklar oilasida tug‘ilgan Tildaning ota-onasi qizini 10 yoshga to‘lganida Kentdagi maktab-internatga yuborgan. Malika Diana bilan birga o‘qigan aktrisa maktabini konslager bilan taqqoslagan. U ta’lim jarayoni shafqatsizlarcha amalga oshirilgani bunday usul bolalarga ta’lim bermasligini ma’lum qilgan. “Ularga ota-onasi va ular bera olishi mumkin bo‘lgan sevgisi kerak”, — degan Tilda.

Kventin Tarantino

Foto: “Liza”

Dunyoga mashhur rejissor maktabni yoqtirmagani sabab o‘rta ma’lumotga ham ega bo‘lmagan. Film tomosha qilish va rejissorlik faoliyatini tahlil qilishni yoqtirgan Kventin 15 yoshida onasi bilan jiddiy gaplashib, o‘quv muassasasini tashlashga ko‘ndirgan. Avvaliga kinoteatrda chipta sotuvchi bo‘lgan Tarantino keyinchalik rejissor sifatida mashhurlikka erishgan. “Men maktabni yomon ko‘rganman. U yerda o‘zimni yomon his qilganman. Men hatto o‘rta ma’lumotli bo‘lmay turib ham erishgan yutuqlarimdan g‘urur hissini tuyaman. Bu odamlarni hayratga soladi. Men Amerika ta’lim tizimining muxlisi emasman. Maktabni shunchalik yomon ko‘rganimdan to‘qqizinchi sinfda qochib ketganman”, — degan rejissor.

Selena Gomes

Foto: “Liza”

Maktab yillari orqa partada o‘tirgan Selenaning tengdoshlari bilan suhbatlashishdan ko‘ra kitob o‘qishni ma’qul ko‘rgani uning sinfdoshlariga yoqmagan. “Maktab yillarini hayotimning eng yaxshi davri deb hisoblamayman”, — degan Selena bu vaqtda o‘zi haqidagi fikri salbiy bo‘lganini qo‘shimcha qilgan.

Anna Sedokova

Foto: “Liza”

Rus estradasi xonandasi Annani maktab yillari ham havas qiladigan darajada o‘tmagan. Maktabdoshlarining ustidan kulishi va haqoratlashi sabab qo‘shiqchi burchaklarda berkinib yig‘lagan. Shu bois o‘quvchilik yillari haqida eslashni ham xohlamaydigan Anna kunlardan bir kuni bunday muammolarga duch kelgan qizlarga ruhan dalda berish uchun dardini dasturxon qilgan. U do‘stlari o‘ynab-kulib yurgan bir vaqtda moliyaviy muammolar sabab atrofdagilarning munosabatidan ruhiy tushkunlikda bo‘lganini ma’lum qilgan.