Yevropada 2020-yil meteorologik kuzatuvlar tarixida 150 yil ichidagi eng issig‘i bo‘ldi. Bu haqda Reuters xabar berdi.
Foto: EPA
“Yevropada harorat har faslda ko‘tarilgan”, — dedi Yevropa Ittifoqining Copernicus Earth deb nomlangan Yerni kuzatish dasturining katta ilmiy xodimi Freya Vamborg AQShdagi ekologiya sammitida.
2020-yil 1850-yildan buyon kuzatilgan eng iliq yil bo‘ldi. 2020-yilda Yevropada o‘rtacha yillik harorat avvalgi eng iliq besh yilga qaraganda kamida 0,4 daraja yuqori bo‘ldi, shuningdek, ularning barchasi so‘nggi o‘n yillikka to‘g‘ri keldi.
Qishning o‘rtacha harorati 3,4 darajaga yuqoriladi. Issiqlik to‘lqinlari so‘nggi yillardagi kabi kuchli va uzoq davom etmagan bo‘lsa-da, yoz ham tarixdagi eng issig‘i bo‘ldi. Lekin Skandinaviya va Fransiyada rekord darajadagi issiqning o‘choqlari qayd etildi.
O‘z navbatida, Vamborg Arktikadagi vaziyatni “ajoyib” deb atadi. Shuningdek, mutaxassis Sibirda o‘ta yuqori harorat va qor qoplamining pasayishi oqibatida kelib chiqqan o‘rmon yong‘inlari haqida gapirdi. Umuman olganda, Sibirdagi harorat 1981—2020 yillardagi o‘rtacha ko‘rsatkichdan 4,3 daraja yuqori bo‘ldi.
Eslatib o‘tamiz, avvalroq dunyo rahbarlari ishtirokidagi iqlim o‘zgarishi bo‘yicha sammitda AQSh, Xitoy, Fransiya, Germaniya, Rossiya, Hindiston, Kanada, Yaponiya davlatlarining yetakchilari nutq so‘zladi.
Ma’lumot uchun, Kornell universiteti tomonidan AQSh Qishloq xo‘jaligi vazirligi ko‘magida olib borilgan tadqiqotga ko‘ra, iqlim o‘zgarishi oqibatida qishloq xo‘jaligining umumiy milliy mahsuldorligi 1960-yillardan buyon 21 foizga pasaygan. Bunday pasayish so‘nggi yetti yil ichidagi mahsuldorlikning o‘sishini yo‘qotish bilan tengdir, deya ta’kidlaydi olimlar.
