Markaziy Osiyodagi Amerika universiteti (MOAU) prezidenti Endryu Kachins Qirg‘izistonda narkotik moddalarning noqonuniy aylanmasiga aloqadorlikda gumon qilinmoqda. Bu haqda Qirg‘iziston Ichki ishlar vazirligi xabar berdi.
U chaqirganda yetib kelish majburiyati bilan qo‘yib yuborildi.
Qirg‘iziston Davlat bojxona xizmati ma’lumotlariga ko‘ra, 11-mart kuni Dubay (BAA)dan Kachins nomiga MOAU manzili ko‘rsatilgan posilka bojxonaga kelib tushgan. Ilova qilingan hujjatlarda posilka ichida nashriyot mahsulotlari borligi aytilgan, ammo aslida u yerda tabletka va kapsulalar bo‘lib, ular kichik polietilen paketlarga o‘ralgan va ustida qabul qiluvchining abonent raqami ko‘rsatilgan. Ekspertiza posilka ichidagi narsalarda psixotrop moddalar borligini aniqlagan.
12-mart kuni IIV tergov xizmati “Narkotik vositalar, psixotrop moddalar va ularning analoglarini noqonuniy ishlab chiqarish yoki sotishga teng bo‘lgan noqonuniy tayyorlash, sotib olish, saqlash, tashish, sotish maqsadida qayta yuborish” moddasi bo‘yicha sudgacha tergov boshladi. Kachins so‘roq qilingan, uning uyida tintuv o‘tkazilgan.
“MOAU” talablari Facebook guruhida oliy ta’lim muassasasi vasiylik kengashi a’zosi Devid Laxdxirning yozishicha, posilkaning ichidagilar Kachinsning shifokori tomonidan tayinlangan dorilardir. Uning so‘zlariga ko‘ra, dori AQShda qo‘llash uchun ma’qullangan bo‘lib, Amerikadagi yirik dorixona tomonidan pochta orqali yuborilgan.
AQSh fuqarosi Kachins taniqli siyosatshunos bo‘lib, SSSR va sobiq ittifoq mamlakatlari bo‘yicha ekspert hisoblanadi. 2003—2006-yillarda Kachins Moskvadagi Karnegi markazi direktori lavozimida ishlagan.
Mavzuga doir:
- Qirg‘izistonda koronavirusga chalingan bemorlarni zaharli o‘t bilan davolash haqida aytgan sog‘liqni saqlash vazirining iste’fosi talab qilinmoqda
- Qirg‘izistondagi referendumda saylovchilarning qariyb 80 foizi prezident vakolatlarini kuchaytirish va parlamentni qisqartirishni yoqlab ovoz berdi
- Qirg‘izistonda korrupsiya mojarosi fonida Oliy sud raisi lavozimidan ozod qilindi
Izoh (0)