DXX Namangan viloyati boshqarmasi hamda viloyat IIB xodimlari hamkorligida o‘tkazilgan tezkor tadbirda Andijon viloyati Xo‘jaobod tumanida joylashgan “Do‘stlik” xalqaro nazorat o‘tkazish maskanida Namangan shahrida yashovchi ayol o‘zining 2 nafar tanishini Turkiyaga fohishalik qilish maqsadida olib ketayotgan vaqtida ushlangan. Bu haqda DXX matbuot xizmati “Daryo”ga ma’lum qildi.
Aniqlanishicha, 34 yoshli N.N. 2021-yilning mart oyida Turkiyadan doimiy yashash manziliga qaytib kelgach, 28 hamda 31 yoshli ikki nafar tanish ayolni Istanbul shahrida fohishalik bilan shug‘ullanib, pul topishga qiziqtirgan.
So‘ng Turkiyaga Qirg‘iziston orqali ketishlarini aytib, ularga o‘z hisobidan Bishkek—Istanbul aviareysiga chipta olib bergan, shuningdek, viza hamda chet elga chiqish pasportlari uchun to‘lovlarni ham amalga oshirgan.
“Bu bilan ularni o‘ziga moddiy jihatdan qaram qilib, manzilga yetib borganlaridan keyin bir oy davomida fohishalik qilish orqali sarflangan yo‘l xarajatlarini qoplashlarini hamda har oyda ishlab topgan pullarining 30 foizini berishlarini talab qilgan”, — deyiladi xabarda.
Ta’kidlanishicha, N.N. Turkiyada bo‘lgan davrida O‘zbekistondan borgan ayollarni fohishalik bilan shug‘ullanishga majburlab kelgan. Hozirda unga nisbatan Jinoyat kodeksining 135-moddasi (odam savdosi) bilan jinoyat ishi qo‘zg‘atilgan.
Avvalroq Anqarada ayollarni qo‘rqitib, fohishalik qilishga majburlab kelgan jinoiy guruh qo‘lga olingani, Navoiyda boshpanasiz qizga o‘z uyidan joy berib, uni fohishalikka majburlagan ayol ushlangani, Jizzaxda 3 nafar ayolni fohishalik qilish uchun Turkiyaga jo‘natayotgan 21 yoshli yigit qo‘lga olingani haqida xabar berilgandi.
