Yaponiyada salonida billur qandili bor Cadillac limuzini sotuvga qo‘yildi (foto)

Yaponiyada 1994-yilgi Cadillac Fleetwood sedani bazasida yaratilgan noodatiy limuzin sotuvga qo‘yildi. Pushti salon va qandilga ega turfa rangli avtomobilni 395 ming iyenaga (3,6 ming dollar) xarid qilish mumkin, deb xabar beradi Motor.

Limuzin 1994-yilda ishlab chiqarilgan klassik Cadillac Fleetwood bazasida yaratilgan. Uni yaratishda muhandislar sedanni ikkiga bo‘lgan, mashina o‘rtasiga qo‘shimcha kuzov qismlarini o‘rnatgan. Mutaxassislar g‘ildiraklar bazasini uzaytirganiga qaramay, limuzin to‘rt eshikligicha qolgan.

Cadillac Fleetwood Brougham kuzovi abstrakt naqshlarni yodga soluvchi turfa ranglarga bo‘yalgan. Shu bilan birga, uzoq yillar davomida foydalanilgan mashinaning lak-bo‘yoqli qoplamasi yaroqsiz holga kelib qolgan. Mashinaning tom qismi korroziya o‘chog‘iga aylangan, bo‘yoq deyarli ko‘chib ketgan.

Taxminlarga ko‘ra, noodatiy Cadillac’dan turli bayram kechalarini o‘tkazishda foydalanilgan. Avtomobilning ekstravagant interyerini boshqacha tushuntirib bo‘lmaydi. Limuzin saloni mayin pushti material bilan qoplangan, markaziy ichki qismida yumaloq stol joylashgan, tyunerlar shift qismiga haqiqiy billur qandilni joylashtirgan. Saqlanib qolgan stellajlarga ko‘ra, Cadillac Fleetwood interyeriga mini-bar va akustik tizim joylashgan, biroq vaqt o‘tishi bilan avtomobil saloni ham yaroqsiz holga kelib qolgan.

Noodatiy limuzin 260 ot kuchiga ega 5,7 litrli V8 motori yordamida harakatga keladi. Agregat to‘rt pog‘onali avtomat uzatmalar qutisi yordamida boshqariladi. Hashamatli Cadillac Fleetwood Brougham’ning egasi uni 295 ming iyenaga sotishga tayyor.

Avvalroq AQShda “Cho‘qintirgan ota” filmidagi Cadillac limuzini auksionga qo‘yilgani, Rossiyada 41 yillik “ZIL” limuzini BMW 7-Series Long narxida sotilayotgani to‘g‘risida xabar berilgandi.