Olmaliq shahar hokimi Qobil Hamdamov koronavirusga qarshi emlandi (video)
Olmaliq shahar hokimi Qobil Hamdamov koronavirusga qarshi vaksina bilan ko‘ngilli ravishda emlandi. Bu haqda shahar hokimligi matbuot xizmati ma’lum qildi.
Hokimlik tomonidan e’lon qilingan videoda hokim AstraZeneca vaksinasi bilan emlanganini ko‘rish mumkin.
AstraZeneca vaksinasining to‘liq emlash kursi 2 dozadan iborat. Ikkinchi doza birinchi doza bilan emlangandan 28 kun o‘tib yuboriladi.
Aholini koronavirusga qarshi emlash tadbirlari 1-apreldan boshlandi. O‘zbekistonda bugungi kunda 1 million 660 ming doza vaksina bor. Ularning 660 ming dozasi COVAX jamg‘armasi tomonidan olib kelingan AstraZeneca vaksinasi, 1 million dozasi — O‘zbekiston—Xitoy hamkorligida ishlab chiqilgan ZF-UZ-VAC 2001 vaksinasi.
Aholini ushbu vaksinalar bilan emlash bir paytning o‘zida amalga oshiriladi. Bunda emlanuvchi birinchi emlanishni qaysi vaksina bilan boshlasa, ikkinchisini ham aynan o‘sha vaksina bilan yakunlaydi. AstraZeneca vaksinasi bilan 2 marotaba, ZF-UZ-VAC 2001 vaksinasi bilan 3 marotaba emlash ko‘zda tutilmoqda. Ya’ni vaksinatsiya ikki xil vaksinada ikki xil amalga oshiriladi. Shuningdek, O‘zbekistonda xususiy klinikalarga COVID-19’ga qarshi pulli emlash o‘tkazishga ruxsat beriladi. To‘liq emlash kursini tamomlagan fuqarolarga QR-kodli sertifikat beriladi.
Nurmat Otabekovning o‘zi istalgan vaksina bilan jon deb emlanishini ma’lum qilgan.
Eslatib o‘tamiz, bundan avval Farg‘ona va Samarqandda aholini koronavirusga qarshi emlash tadbirlari boshlangani haqida xabar berilgan, O‘zbekiston Sog‘liqni saqlash vazirligi qayerda vaksinatsiya jarayonlari o‘tkazilishi haqida ma’lumotni e’lon qilgan.
