O‘zbekistonda koronavirusga chalinish bo‘yicha 2021-yilgi kunlik antirekord ketma-ket beshinchi kun yangilandi. Toshkentning o‘zida 164 kishida COVID-19 tasdiqlangan

O‘zbekistonda koronavirusga chalingani rasman tan olinganlar soni 82 536 nafarga yetdi. Sog‘liqni saqlash vazirligi ma’lumotlariga ko‘ra, 28-mart kuni mamlakatning 10 ta hududida jami 196 ta kasallanish holati aniqlangan. Bu 2021-yil hisobidan yangi antirekorddir. Bundan avvalgi eng yomon ko‘rsatkich (194 ta holat) bir kun avval — 27-mart kuni qayd etilgan edi.

Yangi kasallanish holatlarining:

• 3 nafari Qoraqalpog‘iston Respublikasida,
• 1 nafari Andijon viloyatida,
• 5 nafari Buxoro viloyatida,
• 1 nafari Jizzax viloyatida,
• 3 nafari Qashqadaryo viloyatida,
• 2 nafari Namangan viloyatida,
• 1 nafari Samarqand viloyatida,
• 2 nafari Sirdaryo viloyatida,
• 14 nafari Toshkent viloyatida,
• 164 nafari Toshkent shahrida koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.

SSVning qo‘shimcha qilishicha, o‘tgan bir sutka davomida Andijonda sakkiz kishi, Surxondaryoda 5 kishi, Toshkent viloyatida 15 kishi, Toshkent shahrida esa 116 kishi, respublika bo‘yicha jami 144 kishi COVID-19 kasalligidan sog‘aygan. Sog‘ayish ko‘rsatkichi 98 foizni tashkil etmoqda.

“Ayni paytda tibbiyot muassasalarida davolanayotgan 1243 nafar bemordan 191 nafari og‘ir, 85 nafari esa o‘ta og‘ir ahvolda”, — deyiladi SSV axborotida.

Eslatib o‘tamiz, 27-mart holatiga ko‘ra, O‘zbekistonda bir sutka davomida 194 kishida koronavirus aniqlangan — bu 2021-yil hisobidan yangi antirekord hisoblanadi. Hozirga qadar mamlakatda COVID-19 oqibatida vafot etganlar soni 626 nafarga yetgan.