Qibray tumani Do‘stlik ko‘chasidagi Progress Roman kompaniyasiga tegishli ishlab chiqarish hududida 3-fevralga o‘tar kechasi yong‘in chiqqan. Bosh prokuratura matbuot xizmatidan “Daryo”ga ma’lum qilishlaricha, “yong‘in sodir bo‘lgan binoda 42 yoshli fuqaroning murdasi topilgan”.
Bosh prokuraturaning qo‘shimcha qilishicha, “holat yuzasidan tuman prokuraturasi tomonidan sudga oid tibbiyot ekspertizasi tayinlangan, tergovga qadar tekshiruv harakatlari olib borilmoqda”. Toshkent viloyati Favqulodda vaziyatlar boshqarmasidan ma’lum qilishlaricha, yong‘in oqibatida “GAZel” yuk mashinasi ham yonib ketgan.
Viloyat FVBning qayd etishicha, yong‘in Progress Roman’ga tegishli hududda 2019-yildan beri shartnoma asosida faoliyat yuritayotgan yakka tartibdagi tadbirkor Knyazevga tegishli sexda yuz bergan. “Yong‘in sodir bo‘lgunga qadar hududning yong‘inga qarshi holati biror marta tekshiruvdan o‘tkazilmagan”, – deyiladi boshqarma ma’lumotida.
Boshqarma vakillari tekshiruvlar o‘tkazilmaganiga O‘zbekistonda so‘nggi yillarda tadbirkorlik subyektlarida tekshirishlar o‘tkazishga moratoriy joriy qilinganini sabab qilib ko‘rsatgan. Yuz bergan fojiadan so‘ng bunday holat qayta takrorlanmasligi uchun ham tekshiruv o‘tkaziladimi, degan savolga viloyat FVB javob bermadi.
Yong‘in sodir bo‘lgan hududdan ustidan yuqori kuchlanishni elektr simlari o‘tgan. Bunday inshootlar yaqinida binolar qurish, ishlab chiqarish tashkil etish belgilangan talab va qoidalarga qanchalik muvofiqligi to‘g‘risida berilgan so‘rovga “Hududiy elektr tarmoqlari” kompaniyasi javob bermadi.
Izoh (0)