Ijtimoiy tarmoqlarda Farg‘ona viloyat narkologiya dispanseri xodimining muassasada davolanayotgan bemorga elektroshoker bilan ta’sir o‘tkazayotgani aks etgan video tarqaldi. “Daryo” muxbiri mazkur video tafsilotlarini o‘rganish maqsadida mas’ullar bilan bog‘landi.
“Ijtimoy tarmoqlarda dispanserimiz bilan bog‘liq videolavhalar tarqaldi. Avvalo, shuni aytib qo‘ymoqchimizki, ayni paytda ushbu holat yuzasidan Farg‘ona shahar prokuraturasi tomonidan tergovga qadar surishtiruv harakatlari olib borilmoqda. Surishtiruv yakunlari bo‘yicha holatga to‘liq oydinlik kiritilib, albatta, huquqiy baho beriladi”, — dedi viloyat narkologiya dispanseri bosh shifokori Bobir Ibragimov.
Bosh shifokorning aytishicha, 2021-yil 13-mart kuni dispanserga mast holdagi fuqaro olib kelingan.
“Ushbu fuqaro tibbiyot xodimlarining qonuniy talablariga bo‘ysunmasdan, turli tajovuzkor harakatlar qilganligi sababli navbatchi feldsher yonida bo‘lgan ‘fonarik’ bilan uni tinchlantirishga harakat qilgan. Ushbu holat videotasvirga tushib qolib, ijtimoiy tarmoqlarda biroz noto‘g‘ri talqin qilinmoqda. Videolavhadagi jabrlanuvchi shaxsga nisbatan sud tibbiyot ekspertizasi o‘tkazildi. Ushbu ekspertiza xulosasiga asosan fuqaroda hech qanday tan jarohati alomatlari aniqlanmadi. Ushbu fuqaro tomonidan shikoyat va e’tirozlar bo‘lmadi”, — deydi Bobir Ibragimov.
“Daryo” muxbirining aniqlik kiritishicha, Farg‘ona shahar prokuraturasi ham viloyat narkologiya dispanseri bilan bog‘liq videolavhalar yuzasidan o‘rganish olib borgan.
Prokuraturaning aniqlashicha, 2021-yil 13-mart kuni soat 20:00 da Marg‘ilon shahar IIB XPB profilaktika inspektori D.K. tomonidan Qo‘shtepa tumanida yashovchi M.A. Marg‘ilon shahrida joylashgan “Qishloq qurilish bank” oldida o‘ta mast holatda yurganligi sababli jinoyatchilikning oldini olish maqsadida viloyat narkologiya dispanseriga olib borilgan. Dispanser navbatchi shifokori M.Q. tomonidan hujjatlar asosida M.A. hushyorlantirish uchun qabul qilingan. Shu kuni, taxminan, soat 22:30 da viloyat narkologiya dispanserida feldsher vazifasida ishlovchi T.Sh. yonida bo‘lgan elektroshoker moslamasi bilan mast holatda bo‘lgan fuqaro M.A.ga ta’sir o‘tkazishga uringan.
Bu vaqtda Farg‘ona shahar IIO FMB 1-sonli IIB profilaktika inspektori B.X. tomonidan Farg‘ona shahar Quvasoy ko‘chasida joylashgan “Karvonsaroy” oshxonasi oldida mast holatda yurgan T.M. viloyat narkologiya dispanseriga olib kelingan. U bilan birga kelgan shaxs tomonidan yuqoridagi holat videotasvirga olinib, Telegram hamda YouTube’da tarqatilgan.
Qayd etilishicha, 2021-yil 14-mart kuni video yuzasidan hodisa joyi ko‘zdan kechirilgan va 1 dona qora rangli elektroshoker ashyoviy dalil tariqasida olingan.
“Tergovga qadar tekshirish davomida fuqaro M.A. haqiqatdan ham 2021-yil 13-mart kuni soat 20:00 da Marg‘ilon shahrida joylashgan ‘ Qishloq qurilish bank’ oldida o‘ta mast holatda yurganligi sababli IIB xodimlari tomonidan viloyat narkologiya dispanseriga olib borilganligini, taxminan, soat 22:30 da feldsher vazifasida ishlovchi Sh.T. elektroshoker moslamasi bilan uning bo‘yin qismiga ta’sir o‘tkazmoqchi bo‘lganligini, lekin unga elektroshoker moslamasi tegmagani, IIB xodimlari va shifokorlar tomonidan qiynoqqa solinmaganligi yoki tan jarohati yetkazilmaganligini, hech kimdan da’vosi yo‘qligini bildirgan.
Holat bo‘yicha fuqaro M.A.ga sudga oid tibbiy ekspertiza tayinlangan. Shuningdek, viloyat narkologiya dispanserining navbatchi shifokori M.Q. hamda feldsher Sh.T.ning xatti-harakatlari yuzasidan viloyat Sog‘liqni saqlash boshqarmasiga xizmat tekshiruvi tayinlangan. Hozirda mazkur holat yuzasidan shahar prokuraturasi tomonidan tergovga qadar tekshiruv harakatlari olib borilmoqda”, — deyiladi Farg‘ona shahar prokuraturasi bayonotida.
Farg‘ona viloyat sog‘liqni saqlash boshqarmasi ham ushbu vaziyatga munosabat bildirdi.
“Dastlabaki o‘rganish davomida aniqlanishicha, 2021-yil 13-mart kuni T.Sh. ismli feldsher navbatchiligi vaqtida hududiy profilaktika inspektori tomonidan mast holda bo‘lgan fuqaro dispanserga olib kelingan. Fuqaro tibbiy xodimlar hamda profilaktika inspektorining qonuniy talablarini bajarmasdan, o‘zini o‘ta tajovuzkor tutib, tibbiy xodimlarga tashlangan hamda dispanserning moddiy boyliklariga qo‘pol munosabatda bo‘lgan, eshik, stol, stul va karavotni tepib, sindirishga uringan. O‘z navbatida feldsher fuqaroni tinchlantirish maqsadida oldida bo‘lgan fonarni ‘elektroshoker’ tariqasida ishlatgan va mast holdagi fuqaroni shu tariqa tinchlantirmoqchi bo‘lgan.
2021-yil 15-mart kuni o‘tkazilgan sud-tibbiy ekspertiza xulosasiga ko‘ra, fuqaroning badanida elektroshokerdan olingan hech qanday tan jarohati aniqlanmagan.
Bundan tashqari, Farg‘ona shahar prokuraturasi tomonidan tayinlangan texnik ekspertizada feldsherga tegishli bo‘lgan fonar umuman elektroshoker vazifasini bajara olmasligi hamda mazkur moslama bilan fuqaroga tan jarohati yetkazishning imkoni yo‘qligi o‘z tasdig‘ini topgan.
O‘tkazilayotgan tekshiruv yakuni bo‘yicha kasb etikasi va deontologiyasiga rioya qilmagani uchun feldsherga qonunchilikda belgilangan tartibda chora ko‘rilishini ma’lum qilamiz”, — deyiladi viloyat sog‘liqni saqlash boshqarmasi tomonidan berilgan ma’lumotda.
Mazkur voqeaga munosabat bildirgan viloyat IIB voqea joyida bo‘lib, holatni kuzatib turgan IIB xodimlarining xatti-harakatiga huquqiy baho berilishini bildirgan.
“Mazkur videoni sharhlagan shaxs tibbiyot xodimi elektroshoker bilan fuqaroni bir necha marta urib, vahshiylarcha munosabatda bo‘layotganligini, ammo o‘sha yerda turgan IIB xodimi holatga e’tibor qaratmayotganligini bildirgan.
Farg‘ona viloyat IIB tomonidan o‘tkazilgan tekshiruvga ko‘ra, fuqaro kiyimidagi shaxs IIO xodimi emas, balki narkologiya dispanserida qorovul bo‘lib ishlovchi S.E. ekanligi aniqlangan. Tibbiyot xodimining xatti-harakatlari yuzasidan tegishli hujjatlar rasmiylashtirilib, Farg‘ona shahar prokuraturasi tomonidan tergovga qadar tekshiruv harakatlari olib borilmoqda. Viloyat IIB tomonidan yuqoridagi holatga IIO xodimining aloqadorligi yuzasidan xizmat tekshiruvi tayinlangan bo‘lib, holatga huquqiy baho beriladi”, — deyiladi viloyat IIBning rasmiy munosabatida.
Izoh (0)