Farg‘ona viloyat sudida 2021-yil 16-mart kuni “So‘x voqealari” yuzasidan ochilgan jinoyat ishi bo‘yicha navbatdagi sud majlisi bo‘lib o‘tdi, deb xabar berdi “Daryo” muxbiri Azizjon Ermatov.

Foto: “Daryo”

Sudya Tojiddin Vahobov raisligida davom ettirilgan sud ishida 2020-yilning may oyida viloyatning So‘x tumani Chashma qishlog‘ida qo‘shni davlat fuqarolari bilan suv masalasida kelib chiqqan ommaviy tartibsizliklar yuzasidan ayblangan 22 nafar sudlanuvchining oxirgi so‘zi eshitilgan.

Sudlanuvchilar o‘z so‘zida qilgan ishidan pushaymonligini, o‘sha kuni voqea joyida bo‘lganidan afsusdaligini aytib, sud hay’atidan yengillik berishni so‘ragan.

Foto: “Daryo”

Ma’lum qilinishicha, sud ishining muzokaralar jarayonida So‘x tumanidan viloyat kengashiga saylangan deputat hamda Yoshlar ittifoqi tuman kengashi vakili so‘z olib, so‘xlik yoshlarni kafillikka olishini bildirgan.

Sud ishiga taklif etilgan so‘xlik imom ham yoshlarni doimiy nazorat qilishini va ularning tarbiyasi bilan jiddiy shug‘ullanishini aytib, sud raisidan engillik berishni iltimos qilgan.

Prokuror sudlanuvchilarga nisbatan ozodlikdan mahrum qilish bilan bog‘liq jazo tayinlashni, ularni sud zalidan qamoqqa olishni va jazo umumiy koloniyada o‘talishini so‘ragan.

Foto: “Daryo”

Eslatib o‘tamiz, viloyatning So‘x tumani Chashma qishlog‘ida qo‘shni davlat fuqarolari bilan suv masalasidagi mojaroda ishtirok etgan 22 nafar shaxsga nisbatan qo‘zg‘atilgan jinoyat ishini sudda ko‘rib chiqish jarayoni 2020-yil 9-noyabr kuni boshlangan edi. Shundan so‘ng 23—30-noyabr kunlariga tayinlangan sud majlislari ayrim sabablarga ko‘ra belgilangan vaqtda o‘tkazilmadi.

Jinoyat ishi doirasida 9 nafar shaxsga nisbatan qamoqqa olish va 13 nafar shaxsga uy qamog‘i ehtiyot chorasi qo‘llanilgan. Sudlanuvchilar orasida ikki nafar voyaga yetmagan shaxs ham bor. Sudda voyaga yetmagan sudlanuvchilarning qonuniy vakillari ishtiroki ta’minlangan.

Foto: “Daryo”

Ushbu jinoyat ishi doirasida dastlabki tergov organi tomonidan 22 nafar shaxsga Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga o‘zining xizmat vazifasini bajarish yoki fuqaroviy burchini bajarishdan voz kechishga, shuningdek, qonunga xilof harakatlar sodir etishga majbur qilish) va 244-moddasi (ommaviy tartibsizliklar) bilan ayblov e’lon qilingan.

Jinoyat ishini ko‘rib chiqish davomida 22 nafar sudlanuvchi, 36 nafar jabrlanuvchi va 21 nafar guvoh so‘roq qilingan.

Ta’kidlanishicha, “So‘x voqealari”ga oid jinoyat ishi bo‘yicha sud muhokamasi ochiqlik va shaffoflik tamoyillari asosida olib borilib, sud ishida keng jamoatchilik va ommaviy axborot vositalarining ishtiroki to‘liq ta’minlanmoqda.