AstraZeneca vaksinasidan foydalanish preparatning “vatanida” ham to‘xtatildi

Shvetsiya AstraZeneca shved-ingliz kompaniyasi tomonidan ishlab chiqarilgan koronavirusga qarshi vaksinaning ikkilamchi ta’siriga oydinlik kiritilmaguncha ehtiyot chorasi sifatida preparatdan foydalanishni to‘xtatdi. Bu haqda Shvetsiya Sog‘liqni saqlash agentligiga tayanib “RBK” xabar berdi.

Xabarga ko‘ra, preparatni qo‘llash Yevropaning Dori-darmon agentligi (EMA) tomonidan vaksinatsiyadan so‘ng yuzaga kelishi mumkin bo‘lgan nojo‘ya ta’sirlar tekshirilgunga qadar to‘xtatib turiladi. EMA tekshiruvi davomida emlanganlarning qonida tromb paydo bo‘lishi holatlari emlash bilan bog‘liq yoki yo‘qligini aniqlash rejalashtirilgan. “EMA mazkur holatlarning emlash bilan qanchalik bog‘liqligini aniqlamaguncha vaksinatsiyani to‘xtatib turish muhimdir”, — dedi davlat epidemiologi Anders Tegnell.

Shved kompaniyasining ta’kidlashicha, AstraZeneca vaksinasi koronavirusdan samarali himoya qiladi, qabul qilingan umumiy dozalar miqdori esa 17 milliontaga teng. Shvetsiyaning o‘zida preparatning nojo‘ya ta’siri qayd etilmagan.

Avvalroq ko‘plab Yevropa mamlakatlari AstraZeneca vaksinasidan foydalanishni to‘liq yoki qisman to‘xtatgani haqida e’lon qilgan, xususan, Germaniya, Fransiya, Italiya, Ispaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo, Tailand va Janubiy Afrika mamlakatlarida mazkur vaksinadan foydalanish to‘xtatilgan.

Jahon sog‘liqni saqlash tashkiloti (JSST) bosh direktori Tedros Gebreyesusning aytishicha, tashkilotning vaksinalar xavfsizligi bo‘yicha maslahat qo‘mitasi 16-mart kuni AstraZeneca preparati xavfsizligini ko‘rib chiqadi.

Eslatib o‘tamiz, koronavirusga qarshi AZD1222 vaksinasi Buyuk Britaniya (Oksford universiteti) va Shvetsiya (AstraZeneca) olimlari tomonidan birgalikda ishlab chiqilgan. 2020-yil noyabrgacha AstraZeneca preparatning ikki dozasi bilan emlangan kishilarda vaksina 70 foiz samaradorlik ko‘rsatgani va birinchi dozadan so‘ng 14 kun ichida tanada immunitet hosil bo‘lgani haqida xabar qilgan. Kompaniya vaksinaning jiddiy ikkilamchi ta’siri yo‘qligini aytgan. Shu bilan birga, vaksinani sinovdan o‘tkazishda ishtirok etgayotganlardan biri vafot etgani sababli preparatni dastlabki o‘rganish vaqtincha to‘xtagan. Biroq keyinchalik shifokorlar uning o‘limi emlash bilan bog‘liq emas va vaksina sinovi xavfsiz o‘tgan, degan xulosaga kelgan.

Ommaviy emlashlar boshlangandan so‘ng vaksinani qabul qilganlar orasida kasalxonaga yotqizish va o‘lim holatlari kuzatila boshladi. O‘lim holatini o‘rgangan shifokorlar ushbu dori bilan emlanganlarda qon tromblari hosil bo‘lganini aniqladi.

O‘z navbatida, farmatsevtika kompaniyasi qon tromblari va emlash o‘rtasida bog‘liqlik mavjudligiga oid dalillar yo‘qligini aytdi. AstraZeneca ma’lumotlariga ko‘ra, Yevropa Ittifoqi va Buyuk Britaniyada 17 million emlanganlar orasida 15 ta chuqur qon trombi va 22 ta o‘pka emboliya holati aniqlangan.