O‘zbekiston chegarasini o‘tgan ikki oy ichida 378,4 mingdan ortiq yo‘lovchi kesib o‘tgan bo‘lib, ularning 173 nafarida koronavirus aniqlangan. Bu haqda AOKAda o‘tkazilgan matbuot anjumanida Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Botir Qurbonov ma’lum qildi.
Axborot va ommaviy kommunikatsiyalar agentligida O‘zbekistonga kirib kelayotgan fuqarolardan COVID-19 ga ekspress-test olish bilan bog‘liq muammolar va ularning e’tirozlariga sabab bo‘layotgan masalalar yechimlariga bag‘ishlangan matbuot anjumani o‘tkazildi.
Anjumanda ma’lum qilinishicha, 2020-yilning 25-dekabridan 2021-yilning 2-martiga qadar xalqaro aeroportlar orqali 708 ta samolyot, temiryo‘llar orqali 8 ta poyezd va avtomobil yo‘llari orqali 70 340 ta avtotransportlar O‘zbekiston hududiga kirib kelgan.
“Ushbu kirib kelgan transportlar yordam 378 454 nafar yo‘lovchi tibbiy sanitariya ko‘rigidan o‘tkazilgan bo‘lsa, ulardan 131 874 nafari chet el fuqarolaridir. Kirib kelgan 325 303 nafar yo‘lovchi avtotransport va haydovchilarni koronavirus infeksiyasiga namuna olingan bo‘lib ulardan 173 nafarida ekspress usulida musbat natija aniqlangan. Jumladan, aviayo‘lovchilar orasida 72 nafarda, avtomobil yo‘llari orqali kelgan yo‘lovchi va xalqaro yuk tashuvchilar orasida 101 nafarida musbat natija qayd etilgan”, — deydi Botir Qurbonov.
Avvalroq Monopoliyaga qarshi kurashish qo‘mitasi O‘zbekiston aeroportlarida koronavirusga qarshi o‘tkazilayotgan ekspress-testlar jarayoni borasida ko‘plab shikoyatlar kelib tushayotganini ma’lum qilib, arzon va sifatli koronavirusga antigen ekspress-test tekshiruvlarini tashkil etish maqsadida Respublika maxsus komissiyasi tomonidan tanlov asosida, jamoatchilikka e’lon bergan holda laboratoriyalarni qayta jalb etish choralari ko‘rilishini bildirgandi.
Tanlov shartlariga ko‘ra, bitta ekspress-test 100 ming so‘mgacha, talabalar uchun esa 50 so‘mgacha bo‘lishi kutilmoqda.
Izoh (0)