AQSh politsiyasiga kelib tushgan ogohlantiruvchi xabarlar va razvedka ma’lumotlari tufayli Vashingtondagi Kapitoliy binosi atrofida xavfsizlik choralari kuchaytirilmoqda. Bu haqda “Interfaks” xabar berdi.
“Qo‘limizdagi ma’lumotlarga asoslanib, xavfsizlik bo‘limi bir necha kun mobaynida, shu jumladan, 4-mart kuni xavfsizlik va kadrlar tizimini kuchaytirish bo‘yicha tezkor choralar ko‘rishda davom etadi”, — deyiladi Kapitoliy politsiyasining Twitter’dagi bayonotida.
— The U.S. Capitol Police (@CapitolPolice) March 2, 2021
Shuningdek, Vashingtondagi tartibni saqlash uchun qo‘shimcha politsiya va Milliy gvardiya zobitlari safarbar etilishi, hamda Kongress binosi atrofiga to‘siqlar o‘rnatilishi ta’kidlangan. Bundan tashqari, Kongress a’zolarining xavfsiz harakatlanishini ta’minlash uchun uchta mahalliy aeroport va temiryo‘l stantsiyasiga qo‘shimcha kuchlar jalb qilinadi.
“Xavfsizlik bo‘limi 4-martga oid axborot va razvedka ma’lumotlaridan xabardor va barcha huquq tartibot organlari bilan hamkorlikda ish ko‘rishni davom ettiradi”, — deyiladi bayonotda.
Ta’kidlanishicha, QAnon fitna nazariyasi tarafdorlari sobiq prezident Donald Tramp 4-mart kuni inauguratsiyasini o‘tkazadi, deb ishonmoqda, chunki mazkur sana 1933-yilga qadar prezident inauguratsiyasi o‘tkaziladigan kun bo‘lib kelgan.
Ma’lumot uchun, Donald Trampni qo‘llab-quvvatlovchilar tomonidan tashkil etilgan “Amerikani qutqarish marshi” nomli norozilik namoyishi ishtirokchilari 6-yanvar kuni poytaxt Vashingtondagi Kapitoliy binosiga bostirib kirgan edi. Trampni qo‘llab-quvvatlash uchun uyushtirilgan namoyish Kapitoliy shturmi bilan tugagan. To‘rt kishi halok bo‘lib, yana bir necha kishi tan jarohati olgan. Politsiya xodimlaridan biri voqea qurboniga aylangan.
Namoyishchilar hujumidan keyin Kapitoliyni ta’mirlash uchun 30 million dollar sarflanishi haqida xabar qilingan.
Izoh (0)