Farg‘ona viloyatining Dang‘ara tumanida qaynota kelinini pichoqlab o‘ldirdi. “Qonun va Ijro” gazetasining ma’lum qilishicha, bunga oilaviy kelishmovchiliklar, kelinning “qaynotam menga tegajog‘lik qildi”, demoqchi bo‘lgani sabab bo‘lgan.
Ma’lum qilinishicha, 3 nafar farzandi bo‘lgan kelin so‘nggi vaqtlarda ko‘p gap qaytaradigan, tez-tez arazlab onasining uyiga ketib qolaveradigan odat chiqargan.
Bir kuni kelin qaynonasi ko‘chaga chiqib ketgan paytda qaynotasiga davolanish uchun uyiga ketishini aytgan. Qaynotasi qaynonangiz chiqsa, ruxsat so‘rab boraverasiz deb aytgan. Shundan so‘ng kelin ishda bo‘lgan turmush o‘rtog‘iga qo‘ng‘iroq qilib, uyga chaqirgan. Ammo eri borolmasligini, dorilarni ham uyiga ketmasdan olaverishini aytgan. Biroq kelini so‘kinib, bu xonadonda erkak yo‘qligini, kamchiliklarni qilib bermayotganini aytib, qaynotasiga qarata ko‘chaga chiqib, kiyimlarini yechib, “qaynotam tegajog‘lik qilyapti, nomusimga tegdi”, deb aytaman deb tuhmat qilgan.
Shundan so‘ng qaynota nevaralarini televizor bor xonaga kiritib yuborib, qassobchilik qilib yurganida ishlatadigan pichog‘ini olib, kelinining ortidan uning xonasiga kirgan. “Qayerga ketasan, kim senga javob berdi? Nimaga menga tuhmat qilasan?” deb qo‘lidagi pichoqni ko‘rsatgan, so‘ng uydan chiqib ketsa, o‘ldirib yuborishini aytib, keliniga tahdid qilgan. Kelin esa “O‘ldirish qo‘lingdan kelmaydi” deya qaynotasini haqorat qilgan. Shundan so‘ng qaynota qotillikka qo‘l urgan.
Qotillik jinoyat ishlari bo‘yicha Dang‘ara tuman sudi tomonidan ko‘rib chiqilgan. Sud jarayonida sudlanuvchi qaynota R.S. o‘ziga nisbatan e’lon qilingan ayblovga to‘liq iqror va pushaymon bo‘lib, kelini D.S. hayotlik paytida biror marta tegajog‘lik qilmagani, qilmishiga pushaymonligi, o‘ziga nisbatan qonuniy yengillik berilishini so‘ragan.
Kelinning onasi kuyovining hurmati yuzasidan qizining qaynotasini kechirgani, unga nisbatan moddiy va ma’naviy da’vosi yo‘qligini bildirgan.
Sud hay’ati sudlanuvchi R.S.ga jazo turi va uning miqdorini tayinlashda jazoni og‘irlashtiruvchi holat mavjud emasligini, qilmishidan chin ko‘ngildan pushaymonligini, muqaddam sudlanmaganligini, aybiga to‘liq iqror va pushaymonligini, jabrlanuvchining og‘ir haqorati sababli ushbu jinoyatni sodir etganini, jabrlanuvchining qonuniy vakilini unga nisbatan da’vosi yo‘qligini, yashash joyidan ijobiy tavsiflanganini jazoni yengillashtiruvchi holatlar sifatida hamda R.S. tomonidan sodir etilgan qotillik usulini e’tiborga olib, o‘zi ayblangan modda sanksiyasida nazarda tutilgan eng kam jazoni tayinlashni lozim topgan.
Qaynotaga nisbatan 10 yil muddatga ozodlikdan mahrum qilish jazosi tayinlangan.
Izoh (0)