Buxoro viloyatining Kogon shahridagi to‘rt sektorga yangi rahbarlar tayinlandi. Bu haqda “Daryo”ga viloyat hokimligi axborot xizmati rahbari Olim Jo‘rayev ma’lum qildi.
Prezident Shavkat Mirziyoyevning Buxoro viloyatiga tashrifi chog‘ida Kogon shahrida yoshlar o‘rtasidagi muammolarni aniqlash va tizimli hal etish borasida kamchilik va muammolar saqlanib qolgani, yoshlarni kasb-hunarga o‘qitish, bandligini ta’minlash va tadbirkorlikka jalb qilish ishlari o‘z holiga tashlab qo‘yilgani, mahallalarga tushib, aholi bilan ishlanmagani yuzasidan barcha sektor rahbarlarini qattiq tanqid ostiga olgan edi.
Ta’kidlanishicha, 3-mart kuni xalq deputatlari Kogon shahar kengashining navbatdan tashqari sessiyasi o‘tkazilgan. Sessiyada viloyat hokimi Botir Zaripov Kogon shahri iqtisodiy salohiyati bilan viloyatda alohida o‘ringa egaligini ta’kidlagan. Shuningdek, so‘nggi yillarda Kogon shahar sektor rahbarlari tomonidan shaharni ijtimoiy-iqtisodiy rivojlantirish, ayniqsa, aholi bandligini ta’minlash va kambag‘allikdan chiqarish, infratuzilma va muhandislik-kommunikatsiya tarmoqlari holatini yaxshilashga etarlicha e’tibor qaratilmaganini ta’kidlagan.
Botir Zaripov 2018-yildan beri Kogon shahriga rahbarlik qilib kelgan Hakim Hoshimovni lavozimidan ozod etish to‘g‘risidagi qarorni o‘qib eshittirgach, shahar hokimi vazifasini bajaruvchi sifatida Hayot Davlatov nomzodi tanlanganini bildirgan.
Hayot Davlatov 1979-yilda Peshku tumanida tug‘ilgan, 1999-yilda Sankt-Peterburg davlat universitetini, 2006-yilda Buxoro davlat universitetini hamda 2011-yilda O‘zbekiston Respublikasi Prezidenti huzuridagi davlat va jamiyat qurilishi akademiyasini tamomlagan. Mutaxassisligi menejment, iqtisodchi.
U ish faoliyatini Buxoro viloyati monopoliyadan chiqarish va raqobatni rivojlantirish hududiy boshqarmasida oddiy nazoratchi sifatida boshlab, Buxoro viloyati hokimligi iqtisodiyot bosh boshqarmasi boshlig‘i o‘rinbosari, Buxoro viloyati qurilishda tanlov savdolari va narxlarni shakllantirish konsalting markazi direktori, Buxoro viloyati Investitsiya bosh boshqarmasi boshlig‘i lavozimlarida ishlagan. Shu vaqtga qadar Buxoro viloyati qurilish bosh boshqarmasi boshlig‘i lavozimida ishlab kelgan.
Davlat rahbari tanqididan so‘ng Kogon shahri prokurori, ichki ishlar bo‘limi boshlig‘i va davlat soliq inspeksiyasi boshlig‘i ham lavozimidan ozod etilgan edi. Sessiyada ushbu lavozimlarga ham yangi rahbarlar tayinlangani ma’lum qilingan.
Kogon shahar prokurori lavozimiga Sodiqjon Jo‘rayev tayinlangan bo‘lsa, IIB boshlig‘i lavozimiga Azizbek Rajabov munosib ko‘rilgan. Shahar DSI boshlig‘i lavozimiga esa Alisher Latipov tayinlangan.
“Kogon shahrini taraqqiy ettirish bo‘yicha belgilangan vazifalarni bajarish bugundan shaharga yangi tayinlangan barcha sektor rahbarlari, shuningdek, mahalliy kengash deputatlari va jamoatchilikning yanada faolligiga bog‘liq. Ana shunda ishimizda unum, natijadorlik bo‘ladi”, — degan sessiyada so‘z olgan Botir Zaripov.
Izoh (0)