NATO Iroqdagi qo‘shinlari sonini 500 kishidan 4 000 kishiga yetkazishni rejalashtirmoqda. Bu haqda tashkilot bosh kotibi Yens Stoltenberg ma’lum qildi, deb xabar beradi “RBK”.

Foto: “RIA Novosti”

“Bizning missiyamiz hajmi 500 kishidan taxminan 4 000 kishiga ko‘payadi. Tarkibni kengaytirish bosqichma-bosqich amalga oshiriladi. O‘quv mashg‘ulotlari Iroqning yanada ko‘proq xavfsizlik muassasalari va Bag‘doddan tashqaridagi hududlarni qamrab oladi”, — dedi Stoltenberg.

Tashkilot bosh kotibining so‘zlariga ko‘ra, tarkibning kengayishiga Iroq armiyasini terrorizmga qarshi kurashda qo‘llab-quvvatlash va IShIDning qaytishiga yo‘l qo‘ymaslik istagi sabab bo‘lgan.

2020-yil yanvar oyining birinchi yarmida AQShning Bog‘dod hududiga uyushtirgan aviazarbasi natijasida, Eron generali Qosim Sulaymoniy o‘ldirilganidan so‘ng NATO o‘z tarkibining bir qismini Iroqdan olib chiqib ketgandi. Bungacha Iroqda xorijiy davlatlar qo‘shinlarini mamlakat hududidan chiqarib yuborishga tayyorgarlik boshlangan. Biroq 2020-yil fevralida NATO mudofaa vazirlari Iroqdagi “xalqaro terrorizmga qarshi kurash” missiyasini kuchaytirishga qaror qilgan.

2021-yilning 10-fevralidan Turkiya qurolli kuchlari Iroq shimolida yangi harbiy operatsiya boshlagan edi. Qayd etilishicha, terrorchilikka qarshi mazkur operatsiya Iroq shimolidagi Gara viloyati hududida o‘tkaziladi. Harbiy harakatlar mazkur hududdagi Kurdiston ishchi partiyasining guruhlariga qarshi olib boriladi.

Avval Iroqda IShID rahnamolaridan biri yo‘q qilingani haqida xabar berilgandi. Bir necha oy davomida tayyorgarlik ko‘rilgan antiterror operatsiyasi 27-yanvarda Kirkuk shahrida amalga oshirilgan. Unda IShIDning 10 nafar terrorchisi o‘ldirilgandi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.