Toshkentda Diplomat university nomli yangi xususiy universitet ochilishi kutilmoqda. Bu haqda 23-fevral kuni jamoatchilik muhokamasi uchun e’lon qilingan Vazirlar Mahkamasi qarorida belgilangan.
Hujjatga ko‘ra, universitetda iqtisodiyot, axborot texnologiyalari, huquqshunoslik, xalqaro munosabatlar yo‘nalishlarida ta’lim beriladi. O‘qish kredit tizimida, ta’limning kunduzgi, onlayn va kechki shakllarida, o‘zbek, ingliz va boshqa tillarda tashkil etiladi.
O‘quv jarayoniga chet el yetakchi universitetlarining professor-o‘qituvchilari, olimlar va mutaxassislar jalb etiladi. Universitet o‘qituvchilari malaka oshirish va qayta tayyorlash uchun nufuzli xorijiy oliy o‘quv yurtlari va ilmiy muassasalariga amaliyotga jo‘natiladi.
Diplomat university’ga The times higher education TOP-1000 reytingiga kiritilgan chet el universitetlarining O‘zbekistondagi filialini ochish huquqi beriladi.
Universitet bitiruvchilariga respublikada oliy ma’lumot to‘g‘risidagi hujjat sifatida e’tirof etiladigan diplom beriladi.
Qarorga binoan, universitet Toshkent shahrida faoliyat yuritadi va 2022-yil 1-avgustga qadar barcha turdagi soliqlarni to‘lashdan ozod qilinadi.
Ochiq ma’lumotlarga ko‘ra, ta’sischisi Dilshod Saydamenov bo‘lgan Diplomat university’ning ustav kapitali 100 million so‘m bo‘lib, 2020-yil 9-sentabrda tashkil etilgan.
Qaror loyihasida universitet Toshkent shahrining Matbuotchilar, Sayilgoh va Ota Turk (hozirgi Zarafshon ko‘chasi) ko‘chalari kesishmasidagi binoda joylashtirilishi belgilangan, ammo aniq bino nomi keltirilmagan. Qaror ilovasida esa “tashkil etilishi rejalashtirilayotgan oliy ta’lim muassasasi Toshkent shahri, Mirobod tumani Amir Temur shoh ko‘chasiga joylashtirishi belgilangan”, deb yozilgan.
Universitet aynan qaysi binoga rejalashtirilishi kutilayotgani, loyihada aynan qaysi bino nazarda tutilganini bilish maqsadida “Xalq so‘zi online” loyiha yaratuvchisi deya keltirilgan Oliy va o‘rta maxsus ta’lim vazirligi bilan bog‘langan. Biroq vazirlik aynan qaysi bino nazarda tutilayotganini bilmasligini aytgan.
Buni bilish maqsadida Toshkent shahar hokimligi, Davlat aktivlarini boshqarish agentligi bilan ham bog‘lanilgan, ular ham bexabar ekanligini ta’kidlagan.
Telegram’dagi “Bankiroff” kanali muallifi, iqtisodchi Otabek Bakirovning yozishicha, bu manzilda joylashgan va bo‘sh binolar orasida faqat Davlat xavfsizlik xizmatining umumiy maydoni 20 219 kvadrat metr bo‘lgan “Sobiq markaziy bino hududi” joylashgan. Mazkur bino Prezidentning 2020-yil oktabrdagi farmonga asosan sotuvga qo‘yilgan.
Avvalroq Toshkent amaliy fanlar universiteti ochilishi kutilayotgani haqida xabar berilgan edi.
Izoh (0)