Shavkat Mirziyoyev 15-fevral, dushanba kuni Jizzax viloyatining investitsiya loyihalari taqdimoti bilan tanishdi, deya xabar bermoqda Prezident matbuot xizmati.

Foto: Prezident matbuot xizmati

Davlat rahbariga mazkur viloyatda 2021-yilda amalga oshiriladigan 515 ta loyiha haqida ma’lumot berildi. Loyihalarning umumiy qiymati — 35 trillion 500 milliard so‘m. Ularning natijasida yiliga 25 trillion so‘mlik mahsulot tayyorlash quvvatiga ega yangi korxonalar, qariyb 23 ming ish o‘rni tashkil etiladi. 264 million dollarlik import o‘rnini bosish hamda 311 million dollarlik eksport imkoniyati yaratiladi.

Ta’kidlanishicha, Jizzax viloyatida qurilish materiallari, avtomobilsozlik va to‘qimachilik sanoati hamda qishloq xo‘jaligi tarmoqlari katta salohiyatga ega. Loyihalarni shakllantirishda ushbu sohalar “drayver” sifatida belgilab olingan.

Foto: Prezident matbuot xizmati

Masalan, qurilish materiallari sanoatida 8 ta loyiha rejalashtirilgan. Ulardan biri — bazalt tolasi va undan turli materiallar ishlab chiqarishga qaratilgan. 723 milliard so‘mlik mazkur loyiha uchun bugungi kunda yer ajratilgan. Korxona 2021-yil III chorakda ishga tushirilib, 205 ta ish o‘rni ochilishi mo‘ljallangan.

Shuningdek, yuqori markali sement, beton plitalar, armaturalar, geosetkalar ishlab chiqarish bo‘yicha ham istiqbolli loyihalar bor.

Avtomobil sanoatida ham loyihalar ko‘zda tutilgan. Masalan, mikroavtobus, tijorat va yuk avtomobillari ishlab chiqarish bo‘yicha loyiha ichki bozor uchun g‘oyat zarur. Bu korxona 2021-yil yakunida foydalanishga topshirilib, 500 kishi ish bilan ta’minlanishi rejalashtirilgan.

Foto: Prezident matbuot xizmati

Jizzax shahrida tashkil etiladigan to‘quvchilik majmuasi mahalliy xomashyoni chuqur qayta ishlash, xotin-qizlar bandligini oshirishda muhim o‘rin tutadi. 39 million dollarlik mazkur korxona qurilishi 2021-yil yozda boshlanib, 2022-yil ishga tushiriladi.

Tog‘li hududlarda dorivor o‘simliklar yetishtirish, ularni qayta ishlab, eksport qilish — davlat rahbari ko‘rsatib bergan ulkan imkoniyatlardan biri. Bugungi kunda mamlakatda shu sohaga ixtisoslashgan 7 ta klaster faoliyat yuritmoqda. Xususan, BMB Trade Group klasteri tomonidan Baxmal tumanida za’faron yetishtirish va qayta ishlash yo‘lga qo‘yilmoqda. 30 million dollardan ziyod qiymatdagi ushbu loyiha natijasida 200 kishi ishli bo‘ladi.

Foto: Prezident matbuot xizmati

Shuningdek, qishloq xo‘jaligida chorvachilik, parrandachilik, go‘sht va sutni qayta ishlash, ipak mato ishlab chiqarish kabi bir nechta loyihalar mo‘ljallangan.

Taqdimotda ushbu loyihalarning iqtisodiy samaradorligi, moliyalashtirish manbalari va infratuzilma masalalari muhokama qilindi.

Foto: Prezident matbuot xizmati

Prezident Shavkat Mirziyoyev Jizzax viloyatining salohiyati bundan ancha katta ekanini, ko‘plab yirik loyihalarni amalga oshirish mumkinligini ta’kidladi. To‘qimachilikda mahalliylashtirishni chuqurlashtirib, tayyor mahsulotlar ishlab chiqarish, yangi o‘zlashtirilayotgan yerlarda talab yuqori meva-sabzavotlar yetishtirib, oziq-ovqat xavfsizligini ta’minlash, yerosti ma’danlarini o‘zlashtirishga xorijiy investitsiyalar jalb etish bo‘yicha topshiriqlar berildi.

Bundan avval Shavkat Mirziyoyev Samarqandning turizm salohiyatini rivojlantirishga doir taqdimot bilan tanishgani, viloyat rahbarlariga 2021-yilda 1,6 milliondan ortiq ish o‘rni yaratish bo‘yicha topshiriq bergani hamda davlat aktivlarini xususiylashtirishni tezlashtirish bo‘yicha topshiriq bergani haqida xabar berilgandi.