Foto: Mo‘ylovi bilan Toshkent ramzlaridan biriga aylangan DAN xodimining mum haykali yaratildi

Toshkent shahar Ichki ishlar bosh boshqarmasida yangi tashkil etilgan shon-sharaf muzeyida mo‘ylovi bilan Toshkent ramzlaridan biriga aylangan DAN xodimi siymosi gavdalantirildi. Bu haqda 12-fevral kuni muzeyning ochilish marosimida ma’lum qilindi, deya xabar bermoqda “Daryo” muxbiri Musulmonbek Ibrohimov.

Muzeyda “budyonniycha” mo‘ylov qo‘ygan toshkentlik yo‘l harakati noziri, starshina Sodiq Qosimov faoliyati haqida ma’lumot beruvchi alohida joy ajratilgan. U ko‘pincha xizmat qilgan “Yosh gvardiya” kinoteatri yonidagi chorraha jonli tarzda gavdalantirilgan.

Sodiq Qosimov 1912-yilda Toshkent shahrida hunarmand oilasida tug‘ilgan. 1931-yilda ichki ishlar organiga oddiy militsioner lavozimiga qabul qilingan. 1933-yilda Toshkent shahrida endi tashkil etilayotgan yo‘l harakati xavfsizligi xizmatiga namunali xodimlar saralab olina boshlagan va rahbariyat tavsiyasiga ko‘ra Sodiq Qosimov mazkur xizmatga birinchilardan bo‘lib qabul qilingan.

Xushmuomala, xushchaqchaq bu insonning fotosurati 1966-yilda “Ogonyok” jurnalining muqovasida bosilgan. Suratkash Lev Sherstennikov Sodiq Qosimovning kayfiyatini, odamlarga va o‘z kasbiga bo‘lgan munosabatini surat orqali aks ettira olgan.

“Odamlar u haqda mashinalar quloq soladigan boshqaruvchi, deb gapirishardi: tayoqchani silkitishi bilan — mashinalar o‘ngga burilar, yana bir silkitish bilan — ular to‘xtab, yo‘lovchilarni o‘tkazib yuborardi”, — deya uning harakatlariga baho berilgan.

Militsiyada xizmat boshlaganidan bir yil o‘tgach, to‘rt nafar jinoyatchini qo‘lga olishda qahramonlik ko‘rsatgani uchun 7-militsiya bo‘limi militsioneri Qosimovga minnatdorlik e’lon qilingan va rag‘batlantirish sifatida velosiped topshirilgan.

Qayd etishicha, ko‘pchilik starshina Qosimovni yo‘l harakatini boshqarish bo‘limi xodimi sifatida eslaydi — poytaxtliklar uni iste’dodli, o‘z ishining mohir ustasi deb bilishar, u haqdagi turli hikoyalar esa og‘izdan og‘izga o‘tib keladi. Harakatlarining ravonligi, go‘zalligi va nafosati uchun odamlar uni “artist” deb atashgan va yosh-u qari uning yo‘l harakatini boshqarishini kuzatish uchun kelgan.

Katta yoshli avlodning eslashicha, Qosimov o‘z ishiga sidqidildan yondashgan. Unga haydovchilar ham, piyodalar va hamkasblari ham hurmat bilan qaragan. Qosimov xizmat boshlaganining 25 yilligi munosabati bilan tantanali tadbir o‘tkazilgan.

Starshina Qosimov uzoq yillik halol xizmati davomida bir necha bor davlat mukofotlariga sazovor bo‘lgan. U hech qachon hayfsan olmagan va rahbariyat tomonidan 83-marta rag‘batlantirilgan. U orden va medallar (jumladan, “Qizil bayroq” va “Qizil yulduz”), “Besh yillik zarbdori” unvonini olgan.