Clubhouse мобил дастури Ўзбекистонда iOS қурилмалари учун юклаб олинган дастурлар қаторида биринчи ўринга чиқиб олди. Бу ҳақда App Annie мобил таҳлил сервиси маълумотларига таяниб, Spot хабар берди.
Clubhouse — 2021 йилдаги энг тез оммалашаётган ижтимоий тармоқлардан бири: икки ҳафтадан камроқ вақт ичида ундан 2 миллионга яқин фойдаланувчи рўйхатдан ўтган бўлиб, у Илон Маск каби машҳурлар ва юзлаб миллион долларли инвестицияга эга Andreessen Horowitz кабиларни ўзига жалб этмоқда.
Ҳозирча сервисдан фақатгина таклиф орқали фойдаланиш мумкин. iOS операцион тизимида ишлайдиган сервисда эшитиш ва гапириш мумкин, холос.
Мулоқот исталган фойдаланувчи яратиши мумкин бўлган «хоналар»да ва битта мавзу атрофида бирлашган одамлардан иборат «клублар»да бўлиб ўтади. «Хоналар» очиқ, фақат фойдаланувчилар учун, махфий ёки фақат «клуб» аъзолари учун кўринишида бўлади.
«Хона»ни исталган вақтда leave quietly тугмаси ёрдамида («секин кетиш») тарк этиш мумкин — мазкур ҳолатда иштирокчи шунчаки суҳбатдан узилади.
«Жонли» мулоқот — сервиснинг бошқа ижтимоий тармоқлар ва замонавий медиадан асосий фарқи ҳисобланади. Clubhouse’да барча реал вақтда гапиради ва ҳар бир суҳбат ўзига хос — олдиндан ёзиб олинган қайдлар мавжуд эмас.
Ўзбекистонда бу каби «хоналар»да Зафар Ҳошимов, Сарвар Рўзметов, Акмал Пайзиев, Кирил Альтман ва бошқа қатор тадбиркорларни учратиш мумкин.
Эслатиб ўтамиз, 2021 йилнинг январь ойида Telegram дунёда энг кўп юклаб олинган дастурга айланган эди.
Изоҳ (0)