Prezident qaroriga muvofiq, Alisher Karimov adliya vazirining o‘rinbosari etib tayinlandi. Bu haqda Telegram’dagi “Huquqiy axborot” kanali xabar berdi.
Alisher Karimov 1978-yilda Andijon viloyatida tug‘ilgan, ma’lumoti oliy. 1999-yilda Toshkent davlat yuridik instituti, 2011-yilda Prezident huzuridagi Davlat va jamiyat qurilishi akademiyasini tamomlagan.
O‘z mehnat faoliyatini 1999-yilda Tashqi iqtisodiy aloqalar vazirligida (hozirgi Investitsiyalar va tashqi savdo vazirligi) Yuridik boshqarmasi yetakchi mutaxassisi lavozimidan boshlagan. O‘zbekistonning Ukrainadagi elchixonasi maslahatchisi lavozimida ham faoliyat olib borgan.
Alisher Karimov 2019-yildan hozirgi vaqtga qadar Adliya vazirligi Qonunchilik bosh boshqarmasi boshlig‘i lavozimida ishlab kelayotgan edi.
Avvalroq adliya vaziri o‘rinbosari Bahrom Qo‘chqorov Markaziy saylov komissiyasi raisi o‘rinbosari lavozimiga saylangani to‘g‘risida xabar berilgandi.