Toshkent shahri va viloyati maktablarida matematika fanini o‘zlashtirish bo‘yicha eng past darajada ekani aniqlandi

Xalq ta’limi tizimida matematika fanini o‘zlashtirish bo‘yicha eng past ko‘rsatkich – Toshkent shahri va viloyati deb baholangan. Bu haqda 26-yanvar kuni Xalq ta’limi vazirligida bo‘lib o‘tgan matbuot anjumanida Fan, ta’lim va sog‘liqni saqlash masalalari qo‘mitasi raisi Odiljon Iminov ma’lum qildi.

“Xalq ta’limi tizimini o‘zrganishimiz davomida ayrim fanlarni o‘zlashtirish bo‘yicha ko‘rsatkich Toshkent viloyati Qoraqalpog‘istondan pastligini ko‘rdik. Xususan, Toshkent shahri va viloyatida matematika fanini o‘zlashtirish respublika bo‘yicha eng past darajada degan xulosaga keldik”, – dedi Odiljon Iminov.

Shuningdek, respublika bo‘yicha o‘quvchilarning umumiy o‘zlashtirish darajasi Sirdaryo viloyatida 60,7 foiz, Toshkent viloyatida 62,4 foiz, Jizzax viloyatida 62,7 foiz, Andijon viloyatida 64,2 foiz, Namangan viloyatida 64,4 foizni tashkil etib, respublika ko‘rsatkichidan past darajada qayd etilgan.

Senatorning aytishicha, ayrim fanlardan nazorat ishlari o‘tkazilganda, o‘quvchilarning o‘zlashtirish darajasi fizika fanidan 54,6 foiz, kimyo fanidan 54 foiz natijani ko‘rsatgan.

“Bunday salbiy holatlarning oldini olish uchun parlament nazoratini yo‘lga qo‘yib, jamoatchilikni, joylardagi kengashlarimizni jalb etish orqali bu jarayonlar oshkora, shaffof tarzda aytilishi kerak. Matematikani bilmasdan turib kelajakka ishonib bo‘lmaydi”, – dedi Odiljon Iminov.