“Ko‘ngil ko‘zi” loyihasi doirasida 478 nafar bolaning ko‘zi operatsiya qilinadi — Saida Mirziyoyeva

2020-yilning dekabrida O‘zbekistonda “Ko‘ngil ko‘zi” loyihasi doirasida maktab-internatlarning barcha — 3 mingdan ortiq ko‘zi ojiz va zaif ko‘ruvchi bolalarini tibbiy ko‘rikdan o‘tkazish va davolash aksiyasi boshlangan edi. Loyiha muallifi, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyevaning ma’lum qilishicha, hozirga qadar respublika bo‘ylab 2964 nafar bola tekshiruvdan o‘tkazilgan.

‘Ko‘ngil ko‘zi’ loyihasi doirasida Qashqadaryo viloyatidagi Oftalmologiya shifoxonasida bo‘ldik. Shifoxona faoliyati va bizning xayriya aksiyamiz doirasida bu yerda tekshiruvdan o‘tayotgan jajji bemorlar bilan tanishdik.

Aksiyaning birinchi bosqichi o‘z yakuniga yetdi. Hozirgi kunga qadar respublika bo‘ylab 2964 nafar bola tekshiruvdan o‘tkazildi.

Navbat ikkinchi bosqichga. Respublika ixtisoslashtirilgan ko‘z mikroxirurgiyasi markazi mutaxassislari ko‘magida bolalar ko‘zlarida o‘tkazilishi lozim bo‘lgan jarrohlik aralashuvining qiyinlik darajasiga ko‘ra kategoriyalarga ajratildi. Bundan kelib chiqqan holda, bolalarning ba’zilari viloyat kasalxonalarida, ba’zilari Toshkentda operatsiya qilinadi, ayrimlari esa xorijdan jalb etilgan mutaxassislar yordamida davolanadi. Jami 478 nafar bola uchun 630 ta operatsiya o‘tkaziladi.

Saida Mirziyoyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari

Ma’lumot uchun, “Ko‘ngil ko‘zi” xayriya aksiyasi 2019-yilning mart oyida o‘z faoliyatini boshlagan. U ko‘zi ojiz va zaif ko‘ruvchi bolalar ta’limi, ularning ma’naviy va ruhiy rivojlanishi uchun munosib shart-sharoitlar yaratish, shuningdek, kelgusi hayotga va jamiyatga moslashishi uchun yo‘naltirilgan.

Loyiha doirasida brayl shriftida darslik nashr etish yo‘lga qo‘yildi, ko‘zi ojiz va zaif ko‘ruvchi bolalar ehtiyojlariga ixtisoslashtirilgan kompyuter markazi yaratildi, barcha maktab-internatlarning texnik bazasi rivojlantirildi va qo‘yilgan maqsadga erishish uchun boshqa kichik loyihalar amalga oshirildi.