Davlat xavfsizlik xizmati Chegara qo‘shinlari harbiy xizmatchilari Qozog‘iston chegarasidan mamlakat hududiga dron yordamida o‘qotar qurolni o‘tkazishga uringan shaxslarni qo‘lga oldi. Bu haqda “O‘zbekiston 24” telekanalida ma’lum qilindi.
“Tezkor-qidiruv tadbiri davomida Toshkent shahrida istiqomat qiluvchi ikki shaxs kuzatuv ostiga olingan. Keyinroq ular O‘zbekiston—Qozog‘iston chegarasining Toshkent tumani hududidan o‘tuvchi qismida Qozog‘istondan dron orqali noqonuniy yo‘l bilan o‘tkazilgan o‘qotar qurolni olgan vaqtida ashyoviy dalillar bilan ushlangan”, — deyiladi xabarda.
Ekspertiza xulosasiga ko‘ra, ushbu qurol o‘q otish uchun yaroqli holatdagi “Makarov” pistoleti hisoblanib, uning o‘qdonida 6 dona jangovar o‘q bo‘lgan.
Tergovga qadar tekshiruv harakatlari davomida aniqlanishicha, ushbu qurol Qozog‘istonda yashovchi shaxsdan 4 ming dollarga sotib olingan bo‘lib, sotuvchi uni dron yordamida chegaradan o‘tkazib bergan.
Ta’kidlanishicha, qo‘lga olingan shaxslardan biri 2012-yilda Jinoyat kodeksining 97-moddasi (qasddan odam o‘ldirish), 2019-yilda esa 168-moddasi (firibagarlik) bilan aybli deb topilib, unga nisbatan 3 yil axloq tuzatish ishlari tayinlangan.
Hozirda mazkur shaxslarga nisbatan qamoq ehtiyot chorasi qo‘llanilib, jinoyat ishi qo‘zg‘atilgan.
Eslatib o‘tamiz, 2019-yilda “Tramadol”ni Qozog‘istondan O‘zbekistonga dron orqali o‘tkazishga urinish holati qayd etilgan edi.
Izoh (0)