O‘zbekistonning barcha viloyatlarida qor bo‘roni kuzatilmoqda. IIV YHXBB axborot xizmatining ma’lum qilishicha, hozirda hududiy YHXB va yo‘lga mas’ul xodimlar tomonidan yo‘lni qordan tozalash ishlariga maxsus texnikalar jalb etilgan.
Favqulodda vaziyatlar vazirligi O‘zbekistonning shimoliy viloyatlarida, xususan, Xorazmda ob-havo keskin sovub ketganini ma’lum qilib, kuchli qor yog‘ayotgani tasvirlangan suratlar bilan bo‘lishdi. Viloyatning ko‘plab tumanlari elektr ta’minotisiz qolgan. Yo‘llarda muzlamalarning oldini olish maqsadida tuz-qum aralashmasi sepilmoqda. Shuningdek, Qarshi shahar hokimligi axborot xizmatining yozishicha, shahardagi yo‘llarning qatnov qismiga ham muzlamaga qarshi qum va tuz aralashmasi sepib chiqilmoqda.
FVV Qamchiq dovonida kuchli qor yog‘ishi kuzatilayotgani sabab yo‘llar maxsus texnikalar yordami tozalanayotgani tasvirlangan video bilan bo‘lishdi. Shuningdek, ijtimoiy tarmoqlarda dovon yo‘lida tirbandliklar yuzaga kelgani to‘g‘risida xabarlar tarqalgan.
Telegram’dagi “Andijon bugun” kanalida esa viloyatda qor bo‘roni sabab yuzaga kelgan ko‘ngilsiz hodisalar to‘g‘risida ma’lumot berilmoqda. Xususan, Andijon shahridagi “Ruboiy” kafesi oldidagi reklama banneri ustuni shamolda egilib ketgan.
Bundan tashqari, Bog‘ishamoldagi eski mashina bozoridagi do‘konning tomi uchib ketib, Damas ustiga qulagan, Shahrixonda “Vatanparvar” tashkilotining tomi shamolda uchib ketib, Espero va Damas’ni bosib qolgan, Asakada bodring ekilgan issiqxonalarning plyonkasi uchib ketgan.
Avvalroq O‘zbekistonda hafta oxirlariga borib havo keskin sovib, qor yog‘ishi haqida ma’lum qilingandi. Shu bilan birga, Toshkent IIBB poytaxtda kuchli shamol bo‘lishi kutilayotgani sababli aholini ogohlantirdi.
Izoh (0)