“Kollejlar Mehnat vazirligi tasarrufiga o‘tkaziladi” — Shavkat Mirziyoyev

Hozirda Oliy va o‘rta maxsus ta’lim vazirligi tasarrufida bo‘lgan kollejlar Bandlik va mehnat munosabatlari vazirligiga o‘tkaziladi. Bu haqda 21-yanvar kuni Shavkat Mirziyoyev Buxoro viloyati Olot tumanida viloyat faollari bilan bo‘lib o‘tgan yig‘ilishda aytib o‘tdi, deb xabar berdi “Kun.uz”.

“O‘zi kollejlarning joyi shu vazirlikda, oliy ta’limda emas. Sababi vazir Nozim Husanov kollejlarga aniq buyurtmalar shakllantirib beradi. Kollejlar esa har bir hududlarga zarur bo‘lgan mutaxassislarni tayyorlaydi.

Davlat rahbarining aytishicha, kollejlar yoshlarni kasblarga o‘rgatib, bu bo‘yicha sertifikatlar berishni yo‘lga qo‘yadi.

“Masalan, hozirgi kunda payvandchilarga talab katta. Ana shunday kasbni kollejlar tizimida o‘rgatib, sertifikat ham beriladi. Hunar o‘rgangandan keyin chet elga borsa ham ishi yurishaveradi. Bundan tashqari, avtomobillar ta’mirlovchi, sartarosh, etikdo‘z kabi o‘nlab hunarlar bor. Mana, ishsizlik, temir daftarni tugatish bo‘yicha aniq reja”, — degan Prezident.

Shuningdek, “Ishga marhamat” monomarkazlarni, mahallalarni kollejlarga biriktirishni topshirgan.

Davlat rahbarining topshirig‘i bilan 2020/2021-o‘quv yilidan boshlab mutlaqo yangi professional ta’lim tizimi yo‘lga qo‘yilishi — 340 ta kasb-hunar maktabi, 147 ta kollej va 143 ta texnikum tashkil etilishi belgilangandi. Kadrlar malakasini xalqaro mehnat bozori talablariga moslashtirish maqsadida Milliy malaka tizimi ishlab chiqiladi.