Toshkent shahar Transport boshqarmasi poytaxtdagi avtotransport vositalari to‘xtash joylari to‘g‘risida so‘rovnoma o‘tkazmoqda.

Foto: “Daryo”

So‘rovnomada quyidagi havola orqali ishtirok etish mumkin.

“Gazeta.uz”ning idora matbuot xizmatiga tayanib yozishicha, fuqarolarning fikri avtoturargohlar infratuzilmasini yaratish bo‘yicha dasturni tayyorlash uchun kerak.

Boshqarma nafaqat transport vositasining egalariga, balki mashinasi yo‘qlarning ham noroziligiga sabab bo‘ladigan ko‘plab muammolarni qayd etgan.

“Garajlar buzilmoqda, o‘rniga esa hech nima yo‘q. Uylar qurilyapti, biroq avtoturargoh doim ham bor emas. Hovlilar mashinalar uchun emas, odamlar uchun bo‘lishi kerak. Mashinalar tartibsiz joylashtirilgani sabab kolyaskasi bor odamlar o‘ta olmayapti”, — deydi Transport boshqarmasi matbuot xizmati boshlig‘i Umida Boboyeva.

Uning qo‘shimcha qilishicha, shahar markazida “To‘xtash taqiqlanadi” belgisining ko‘pligi sabab avtoturargohga aylangan ko‘plab piyodalar yo‘laklarini uchratish mumkin.

Eslatib o‘tamiz, yanvar boshida O‘zbekistonda ko‘p kvartirali uylarga bevosita bog‘liq bo‘lgan avtomashina turar joylari jismoniy shaxslarning mol-mulkiga solinadigan soliq obyektiga kiritilayotgani ma’lum bo‘lgandi. Bunday obyekt soliq bazasiga nisbatan 0,23 miqdoridagi soliq stavkasida soliqqa tortiladi.

Avvalroq Toshkent Transport boshqarmasi veloyo‘laklar bo‘yicha takliflarni yig‘ayotgani to‘g‘risida xabar berilgandi.