Тошкентда ҳайдовчилар ўртасида автотранспорт воситаларининг тўхташ жойлари тўғрисида сўровнома ўтказилмоқда

Тошкент шаҳар Транспорт бошқармаси пойтахтдаги автотранспорт воситалари тўхташ жойлари тўғрисида сўровнома ўтказмоқда.

Сўровномада қуйидаги ҳавола орқали иштирок этиш мумкин.

«Gazeta.uz»нинг идора матбуот хизматига таяниб ёзишича, фуқароларнинг фикри автотураргоҳлар инфратузилмасини яратиш бўйича дастурни тайёрлаш учун керак.

Бошқарма нафақат транспорт воситасининг эгаларига, балки машинаси йўқларнинг ҳам норозилигига сабаб бўладиган кўплаб муаммоларни қайд этган.

«Гаражлар бузилмоқда, ўрнига эса ҳеч нима йўқ. Уйлар қуриляпти, бироқ автотураргоҳ доим ҳам бор эмас. Ҳовлилар машиналар учун эмас, одамлар учун бўлиши керак. Машиналар тартибсиз жойлаштирилгани сабаб коляскаси бор одамлар ўта олмаяпти», — дейди Транспорт бошқармаси матбуот хизмати бошлиғи Умида Бобоева.

Унинг қўшимча қилишича, шаҳар марказида «Тўхташ тақиқланади» белгисининг кўплиги сабаб автотураргоҳга айланган кўплаб пиёдалар йўлакларини учратиш мумкин.

Эслатиб ўтамиз, январь бошида Ўзбекистонда кўп квартирали уйларга бевосита боғлиқ бўлган автомашина турар жойлари жисмоний шахсларнинг мол-мулкига солинадиган солиқ объектига киритилаётгани маълум бўлганди. Бундай объект солиқ базасига нисбатан 0,23 миқдоридаги солиқ ставкасида солиққа тортилади.

Аввалроқ Тошкент Транспорт бошқармаси велойўлаклар бўйича таклифларни йиғаётгани тўғрисида хабар берилганди.