Jasur Jaloliddinovning agenti: “Bunyodkor” sobiq direktori Jasurni qo‘yib yuborishni istamagandi

Moskvaning “Lokomotiv” klubi yarim himoyachisi Jasur Jaloliddinovning agenti Yuriy Belous mijozining transferi bilan bog‘liq muammolar haqida gapirdi.

Avvalroq “Lokomotiv” agentlarga futbolchi uchun sarflangan puldan 6,5 barobar ko‘proq to‘lagani ma’lum bo‘lgandi.

Bu haqda qo‘ng‘iroq tovushini eshitib, biroq u qayerdan kelayotganini bilmaydigan odamlar yozmoqda. Transfer narxining o‘zi yo‘q edi. Ha, agentga to‘lanadigan pullar bor va tamom. Barcha mojaro O‘zbekistonda boshlandi, bizning (Rossiya nazarda tutilmoqda — izoh “Daryo”) OAV esa ularni e’lon qildi.

Bularning barchasi “Bunyodkor” sobiq bosh direktori Jasurni qo‘yib yuborishni istamagani sabab yuzaga keldi: unda “Beshiktosh” va qator boshqa klublardan takliflar bo‘lgan.

Jasurning shartnomasida ma’lum miqdordagi tovon puli to‘langanda uning ketishiga ruxsat beradigan band bor edi va u ketishga qaror qildi. Biznikilarga esa shov-shuv kerak.

Kelishuv bor edi, tovon puli to‘landi, hammasi shaffof va toza kechdi. Hech qanday savolga o‘rin yo‘q.

Yuriy Belous, futbol agenti

Jaloliddinov iyul oyida “Lokomotiv” futbolchisiga aylandi. Biroq moskvaliklar yarim himoyachini Rossiya Premyer Ligasi ro‘yxatidan chiqarib yubordi va Jasur “Tambov”ga ijaraga berildi. Biroq 18 yoshli o‘yinchi “Tambov” safida ham birorta o‘yin o‘tkazmadi.

Eslatib o‘tamiz, 2020-yil iyul oyida “Bunyodkor”ning o‘sha vaqtdagi direktori Ulug‘bek Mirzayev Jasur Jaloliddinov 350 ming yevro evaziga Moskvaning “Lokomotiv” klubiga o‘tayotganini tasdiqlagandi. Orada “Chempionat” nashri “Lokomotiv” Jaloliddinov uchun 1 million yevro sarflashini, mablag‘ning 100 ming yevrosi futbolchining “Bunyodkor” bilan amaldagi shartnomasini bekor qilishga, qolgan 900 ming yevro esa Jasurning agentlariga nasib etishi haqida ma’lum qildi. 29-iyul kuni esa moskvaliklar Jasurning transferini e’lon qildi. Avgust oyi avvalida “Bunyodkor” direktori Ulug‘bek Mirzayev ishdan ketgani aytildi. Shundan so‘ng avgust oyida Professional futbol ligasi Jasur Jaloliddinov transferida shubhali jihatlar borligini e’lon qilib, O‘zbekiston futbol assotsiatsiyasiga murojaat qilgani aytildi. Ushbu murojaat natijalari tashkilot rasmiy saytlarida e’lon qilinmadi.