O‘zbekiston qishloq xo‘jaligi vazirining ikki nafar o‘rinbosari lavozimidan ozod etildi, deya xabar qilmoqda vazirlik matbuot xizmatiga tayanib “Gazeta.uz”.
Qishloq xo‘jaligi vazirining oziq-ovqat sanoatini rivojlantirish bo‘yicha o‘rinbosari Saidkamol Xo‘jayev boshqa ishga o‘tgani munosabati bilan lavozimidan ozod qilingan.
Ma’lum qilinishicha, Saidkamol Xo‘jayev 2018-yilning iyulida qishloq xo‘jaligi vazirining moliya ishlari bo‘yicha o‘rinbosari lavozimiga tayinlangan. 2020-yilning sentabr oyida esa vazirning oziq-ovqat sanoatini rivojlantirish bo‘yicha o‘rinbosari etib tayinlangan. Oldinroq u “Agrobank” rahbari lavozimida ishlagan.
Bundan tashqari, qishloq xo‘jaligi vazirining fan, ta’lim va ishlab chiqarish integratsiyasini ta’minlash bo‘yicha o‘rinbosari Botirjon Sulaymonov ham lavozimidan ozod qilingan. U 2020-yilning sentabr oyida vazir o‘rinbosari lavozimiga tayinlangan edi.
Ma’lumotga ko‘ra, Botirjon Sulaymonov Toshkent davlat agrar universiteti rektori lavozimida qoladi.
Avvalroq Surxondaryoda haydovchiga “yalingan” YPX xodimi, Toshkentda mast holda jamoat tartibini buzgan ichki ishlar organi xodimi hamda Davlat aktivlarini boshqarish agentligining qator hududiy boshqarma rahbarlari faoliyatidagi kamchiliklar tufayli lavozimdan ozod qilingani haqida xabar berilgandi.
Izoh (0)