Jahon sog‘liqni saqlash tashkiloti (JSST) mutaxassislari koronavirus faqat Xitoyda emas, balki boshqa mamlakatlarda ham paydo bo‘lgan bo‘lishi mumkin deb hisoblaydi. Bu haqda tashkilotning xalqaro ekspert guruhi vakili, Rotterdam virusologiya fakulteti dekani Marion Kupmansga tayanib, “Korrespondent.net” xabar qildi.

Ammo, mutaxassislarning fikriga ko‘ra, tadqiqotni 2019-yil dekabr oyida COVID-19 yuqumli kasalligi qayd etilgan Xitoyning Uxan shahridan boshlash kerak.

“Ushbu bosqichda biz hech narsani istisno qilmasligimiz kerak, deb o‘ylayman, lekin birinchi yirik epidemiya sodir bo‘lgan Uxandan boshlash kerak. Biz barcha farazlar uchun ochiq bo‘lishimiz darkor”, – dedi Kupmans.

Avvalroq JSST Xitoyni COVID-19’ning kelib chiqishini aniqlash uchun ekspertlarni mamlakatga kiritmaslikda ayblagandi. Shuningdek, AQSh rasmiylari COVID-19’ni tarqatgan ehtimoliy manba nomini aytgandi.

Bundan tashqari, AQSh prezidenti Donald Tramp 2020-yil may oyi boshida bergan bayonotida Xitoy rasmiylarini kasallik tarqalishining boshlang‘ich davrida koronavirusga doir ma’lumotlarni yashirishda ayblagan. O‘shanda Amerika yetakchisi virus Uxandagi laboratoriyada sun’iy yaratilganini tasdiqlovchi dalillari borligi haqida gapirgan.

Biroq AQSh Davlat departamentining Razvedka va tadqiqotlar byurosi dalillar yo‘qligi uchun bu versiyani tasdiqlamagan. Xitoy esa Trampning ayblovlariga javoban koronavirus laboratoriyada o‘ylab topilganini rad etuvchi JSST xulosalarini ko‘rsatib o‘tgandi.