Fransiya sharqidagi Sona va Luare departamentida joylashgan Relais Chateau maskanidan noma’lum shaxslar umumiy qiymati 350 ming yevro turadigan yuzlab vinolarni o‘g‘irlab ketdi. Yuk mashinasida kelgan jinoyatchilar yerto‘la eshigini buzib kirgan. Muassasa egasini signalizatsiya uyg‘otib yuborgan va u zudlik bilan politsiyaga qo‘ng‘iroq qilgan, deb xabar beradi “Korrespondent.net”.
Foto: Global Look Press
Vino o‘g‘irlagan avtomobil ortidan quvgan politsiyachilarga jinoyatchilar vino butilkalarini otgan.
Keyinroq o‘g‘irlangan vinolar ortilgan yuk mashinasi Lion yaqinidagi Bron shahridan topilgan. Jinoyatchilar yashirinishga muvaffaq bo‘lgan. Huquq-tartibot organi xodimlari uch kishini qidirmoqda.
Eslatib o‘tamiz, Fransiyada 2019-yilning noyabrida bordolik savdogarning 500 ming yevrolik noyob vinolari o‘g‘irlab ketilgan edi.
