Foto: Turk aktyori Burak O‘zchivit va unga ikki tomchi suvdek o‘xshash qiyofadoshi

Turkiyaning mashhur aktyori Burak O‘zchivitning egizagi topildi. Bu haqda “RusTurkey.com” xabar bermoqda.

Ma’lum bo‘lishicha, suratga olish maydonchasida Burak O‘zchivitning model sifatida tanilayotgan Burak Xon ismli adashi hamda o‘xshashi paydo bo‘ldi.

Mahoratli aktyor Burak O‘zchivitning o‘xshashi borligi ma’lum bo‘lgach ko‘plab muxlislarni hayratga soldi. Ta’kidlanishicha, Burak Xon O‘zchivitdan 10 yosh kichkina bo‘lishiga qaramay, aktyorlar bir-biriga juda o‘xshash. Hatto Burakning do‘stlari ham ularning o‘xshashliklaridan hayron qoldi. O‘zchivitning so‘zlariga ko‘ra, uni Xon bilan taqqoslashlarini  hamda bu boradagi savollarga javob berishni yoqtirmaydi.

O‘zchivitning o‘zi aytganidek, Xon undan nusxa ko‘chirmoqda.

“Hammasi oddiy. Xon menga taqlid qilishga urinmoqda, soch va soqolini xuddi menikidek o‘stiradi. Shuningdek, xatti-harakatimga ham taqlid qilmoqda”, − deydi Burak.

Xon va O‘zchivit birgalikda ishtirok etgan reklama roligi rejissorining so‘zlariga ko‘ra, u ba’zida ikki aktyorni ajrata olmay qolgan. Xonning o‘zi bu borada ancha ijobiy fikrda bo‘lib, o‘xshashligi hamkasbi tomonidan rad etilgan bo‘lsada, xafa emas.

“Men O‘zchivitni tushunaman, u yagona bo‘lishni xohlaydi. Bu har qanday aktyor uchun odatiy hol. Men hech kimga taqlid qilmayman, shunchaki suratga tushish maydonchasida o‘xshashlikdan mohirlik bilan foydalanaman”, − deydi Xon. Bundan tashqari u Gollivud yulduzlarining ham o‘xshashlari borligini, ammo mashhurlar ularga nisbatan ijobiy munosabatda bo‘lganini ham ta’kidlab o‘tgan.