Hukumatning “Shaxslar o‘rtasida muloqot vositasi sifatida ishlatiladigan imo-ishora tilini yanada rivojlantirish to‘g‘risida”gi qarori loyihasi muhokamaga qo‘yildi.
Qaror loyihasiga ko‘ra, davlat budjeti mablag‘lari hisobidan o‘rta maktablarda imo-ishora tili va Brayl yozuvini o‘qitish bo‘yicha maxsus kurslar tashkil etilishi rejalashtirilgan.
Loyihaga muvofiq, o‘zbek imo-ishora tili huquqiy maqomga ega bo‘lishi va mulkchilik shaklidan qat’i nazar, barcha tashkilotlarda, muassasalarda va korxonalarda o‘zbek imo-ishora tilini aloqa tili sifatida ishlatish uchun shart-sharoitlar yaratiladi.
O‘zbekiston Xalq ta’limi vazirligi, Oliy va o‘rta maxsus ta’lim vazirligi, Maktabgacha ta’lim vazirligi, Sog‘liqni saqlash vazirligi, Qoraqalpog‘iston Vazirlar Kengashi, Toshkent shahar va viloyatlar hokimliklari 2021-yil 1-avgustga qadar:
- hududlar bo‘yicha talablardan kelib chiqqan holda Qoraqalpog‘iston, Toshkent shahar va viloyatlar, shuningdek, tumanlar (shaharlar) markazlarida joylashgan umumiy o‘rta ta’lim muassasalarida yuridik shaxs maqomiga ega bo‘lmagan maxsus kurslar faoliyatini tashkil etish;
- maxsus kurslarni imo-ishora tili va Brayl alifbosi bo‘yicha amaliy-metodik ish tajribasiga ega bo‘lgan malakali pedagog kadrlar bilan ta’minlash;
- maxsus kurslarda o‘rgatiladigan imo-ishora tili va Brayl alifbosi bo‘yicha mashg‘ulotlar rejalari va dasturlarini ishlab chiqish hamda amaliyotga joriy etish;
- 2021/2022-o‘quv yilidan boshlab maxsus kurslarga zarur o‘quv-metodik majmualar, o‘qituvchilarni metodik qo‘llanmalar hamda badiiy adabiyotlar bilan ta’minlash;
- maxsus kurslar tashkil etilganligi yuzasidan nogironligi bo‘lgan shaxslar va keng jamoatchilik o‘rtasida targ‘ibot-tashviqot ishlarini amalga oshirish choralarini ko‘radi.
Avvalroq Ziroat Mirziyoyeva boshchiligidagi “Zamin” fondi 60 foiz bolalarni karlikdan qutqarishga yordam beruvchi loyiha boshlagani hamda O‘zbekistonda ko‘zi ojiz o‘quvchilar uchun ilk bor 10 va 11-sinf darsliklari chop etilishi xabar berilgandi.
