Toshkent shahrining Shota Rustaveli ko‘chasida 11-dekabr kuni soat 14:50 larda 38 va 58-sonli avtobus haydovchilari poyga uyushtirdi. Bu haqda “Toshshahartransxizmat” matbuot xizmati xabar berdi.
Haydovchilarning shaxsi “Toshshahartransxizmat” Yo‘lovchi transportida harakat xavfsizligini nazorat qilish boshqarmasi tomonidan o‘tkazilgan tezkor surishtiruv natijasida aniqlangan.
Yo‘lovchilar hayotini xavf ostiga qo‘yganligi va avariya holatini sodir etganligi uchun ikki haydovchiga nisbatan 12-dekabr kuni Toshkent shahar IIBB YHXB inspektori tomonidan Ma’muriy javobgarlik to‘g‘risidagi kodeksining 128−5-moddasi bo‘yicha ma’muriy bayonnoma rasmiylashtirilgan. Mazkur moddaga asosan, haydovchilarga nisbatan bazaviy hisoblash miqdorining besh baravari (1 115 000 ming so‘m) miqdorida jarima belgilandi.
Eslatib o‘tamiz, dekabr oyi boshida Toshkentda 72 va 148-avtobuslari poyga uyushtirganligi sababli to‘qnashgani haqida xabar berilgandi. Keyinroq haydovchilarning ikkalasi ham ishdan bo‘shatilgani ma’lum qilingan edi.
Izoh (0)