Bugungi kunda Respublikamizda 30 dan ortiq tijorat banklari faoliyat ko‘rsatib kelmoqda. Mazkur banklar faoliyati aholi farovon hayoti, ular ehtiyojini qondirish va yurtimiz iqtisodiy barqarorligini ta’minlashga qaratilganligi bilan muhim ahamiyat kasb etadi.
“O‘zmilliybank” ham mamlakatning eng yirik tijorat banki sifatida, Prezidentimiz rahbarligida yurtimizda amalga oshirilayotgan iqtisodiy islohotlarning faol ishtirokchisi bo‘lib, yirik investitsion va ijtimoiy loyihalarni moliyalashtirib kelmoqda.
2020-yil 1-dekabr holatiga bankning jami aktivlari 76,1 trln so‘mni tashkil etib, yil boshiga nisbatan 9,5 trln so‘mga, kredit portfeli 63,9 trln so‘mni tashkil etib, yil boshiga nisbatan 8,9 trln so‘mga ortdi.2020-yilning o‘tgan davrida Respublikadagi investitsion va ijtimoiy loyihalarni moliyalashtirish maqsadida 14,0 trln so‘mdan ortiq kredit mablag‘lari ajratildi.
2020-yil 12-mayda O‘zbekiston Respublikasi Prezidentining PF–5992 sonli “2020—2025-yillarga mo‘ljallangan O‘zbekiston Respublikasining bank tizimini isloh qilish strategiyasi to‘g‘risida”gi farmoni qabul qilindi. Mazkur Strategiyaning qabul qilinishi mamlakatimiz bank tizimini rivojlantirishga, xorijiy banklarning tajribasi va moliya sohasidagi xalqaro tendensiyalarni o‘z ichiga olgan transformatsiya jarayonlarini amalga oshirishga ijobiy turtki bo‘ldi.
“O‘zmilliybank”ni xalqaro andozalarga muvofiq ish yuritadigan zamonaviy tijorat bankiga aylantirish maqsadida, bugungi kunda xalqaro konsalting tashkilotlarini jalb qilgan holda bankni transformatsiya qilish jarayonlari amalga oshirilmoqda. Jumladan, bugungi kunda “O‘zmilliybank”da raqamli transformatsiyani amalga oshirishga, bank faoliyatiga innovatsiyalarni joriy qilishga va bu orqali mijozlar uchun yangi raqamli bank xizmat turlarini taklif qilishga muhim e’tibor qaratilmoqda.
O‘zbekiston iqtisodiyoti uchun ahamiyatli bo‘lgan yirik korxonalarni, yangi ishlab chiqarish tarmoqlarini shakllantirish, ularni butunlay yangi tizimda moliyalashtirish, hududlardagi eng istiqbolli va davlat-xususiy sherikchilik asosidagi loyihalarni moliyaviy qo‘llab-quvvatlash shular jumlasidandir.
Bank tomonidan amalga oshirilayotgan islohotlar dunyoning yetakchi reyting kompaniyalari tomonidan ham e’tirof etilmoqda. Bugungi kunda “O‘zmilliybank” Standard & Poor‘s, Moody‘s, Fitch Ratings kabi dunyoning yetakchi agentliklarining reytinglariga ega bo‘lib, ular tomonidan bank faoliyati Barqaror deya baholangan.
“O‘zmilliybank” xalqaro moliya institutlarining mablag‘larini jalb etish va iqtisodiyotning yetakchi tarmoqlarini modernizatsiya qilish, ustuvor va strategik axamiyatga ega investitsion loyihalarni moliyalashtirish bo‘yicha respublikaning yetakchi banki hisoblanadi.
Joriy yilning 15-oktabr kuni O‘zmilliybank tomonidan London fond birjasida 300 million AQSh dollarlik yevroobligatsiyalar muomalaga chiqarildi. AQSh dollarida yevroobligatsiyalarning dastlabki emissiyasi amalga oshirilishi rivojlanayotgan davlatlar banklariga sarmoya kiritishni xohlayotgan keng qamrovli xalqaro investorlarni mamlakatga jalb qildi. “O‘zmilliybank”ning xalqaro kapital bozoridagi faoliyatining boshlanishi bankka nafaqat mahalliy, balki xalqaro moliya bozorida shiddat bilan yuqoriga intilayotgan moliyaviy institut sifatida qo‘shimcha imidj yaratish imkonini berdi.
Kuni kecha, dunyoning 158 mamlakatida nashr etiladigan AQShning nufuzli “Global Finance” moliya jurnali dunyo mamlakatlari bo‘yicha “Dunyoning eng xavfsiz banklari — 2020” (World’s Safest Banks 2020: Country Winners) reytingini e’lon qildi.
Unga ko‘ra, O‘zbekiston Respublikasi Tashqi iqtisodiy faoliyat “Milliy banki” AJ “Markaziy va sharqiy Yevropa hamda sobiq sovet davlatlarining eng xavfsiz banklari” dan biri sifatida e’tirof etildi. Mazkur e’tirofga, bank tomonidan amalga oshirilayotgan chora-tadbirlar natijasida erishilgan desak mubolag‘a bo‘lmaydi.
Reklama huquqi asosida.
Izoh (0)