Футбол бўйича Италия Кубогининг 1/16-финалида «Женоа» 26 ноябрь, пайшанба куни «Сампдория» майдонида меҳмон бўлди.
Учрашувнинг биринчи бўлими тўлиқ мезбонлар устунлигида ўтди. 18-дақиқада Валерио Верре ўзининг супер зарбаси билан дарвозанинг тўққизлик бурчагини аниқ нишонга олди. Танаффусга қадар майдон эгалари яна бир қатор имкониятларга эга бўлди, бироқ ҳисоб биринчи бўлимда бошқа ўзгармади.
Танаффус вақтида «Женоа» устози Роландо Маран майдон марказида иккита ўзгариш қилди ва меҳмонлар вазиятни ўнглашга муваффақ бўлди. Аста-секин устунлик «Женоа» томонига ўтди. 60-дақиқада Элдор Шомуродов чап қанотдан тезлик олиб ярим майдонни босиб ўтди ва жарима майдонига ёриб кириб, яхшироқ имкониятда турган шеригига тўпни узатди. Жанлука Скамакка эса деярли бўш қолган дарвозани қийинчиликсиз ишғол қилди.
68-дақиқада захирадан майдонга қўшилганига саноқли дақиқалар бўлган Лукас Лерагер меҳмонларнинг иккинчи голини урган бўлса, орадан тўрт дақиқа ўтиб, Скамакка якуний ҳисобни ўрнатди — 1:3.
Голлар видеосини бу ерда томоша қилиш мумкин — голлар
Шу тариқа «Женоа» мусобақанинг нимчорак финалига йўл олди ва у ерда «Ювентус»га қарши баҳс олиб боради.
Учрашувда Элдор Шомуродов асосий таркибда майдонга тушиб, 85-дақиқада захирага олинди.
Италия Кубоги
1/16 финал босқичи
26 ноябрь, пайшанба
«Сампдория» — «Женоа» 1:3
Голлар: 1:0 – 18 Верре, 1:1 – 60 Скамакка, 1:2 – 68 Лерагер, 1:3 – 72 Скамакка.«Сампдория»: Аудеро, Тонелли (Кандрева, 87), Ауджелло, Берешински, Йошида, Адриен Сильва (Экдал, 78), Торсбю, Янкто, Верре, ла Гумина (Габбьядини, 87), Лерис (Дамсгор, 77).
«Женоа»: Маркетти, Бани (Масьелло, 79), Гильоне, Голданига, Пеллегрини, Ровелла (Мелегони, 46), Стураро (Лерагер, 65), Зайц (Бадель, 46), Сапата, Шомуродов (Пьяца, 85), Скамакка.
Огоҳлантиришлар: Сапата (13), Адриен Сильва (26), Йошида (27), Стураро (43), Лерис (62), Пеллегрини (69), Гилоне (75).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)