Buxoro viloyatining Romitan tumanida yer maydoni ajratish evaziga tadbirkorni 45 ming dollar pora berishga undagan shaxslar 22,5 ming dollarni olayotgan vaqtida qo‘lga olindi, deya xabar berdi “Daryo” muxbiri.
Ta’kidlanishicha, 2020-yilning 12-noyabr kuni Bosh prokuratura huzuridagi Iqtisodiy jinoyatlarga qarshi kurashish departamentining Buxoro viloyat boshqarmasi va DXX xodimlari tomonidan Vobkent tumanidagi “MMM” MChJning 26 yoshli rahbari K.P.ning arizasi yuzasidan tezkor tadbir o‘tkazilgan.
Arizaga ko‘ra, fuqarolar A.X. hamda S.T. vakolatli tanishlari orqali Romitan tumani markazidan ikkita ko‘p qavatli uy qurishga mo‘ljallangan yer maydoni ajratishi evaziga tadbirkor K.P.ni 45 ming dollar pora berishga undagan. Va so‘ralgan pulning ma’lum miqdorini oldindan berishi lozimligini aytgan.
2020-yilning 12-noyabr kuni ishbilarmon “yer sotuvchi”lar Buxoro shahridagi “Parranda” oshxonasida kimyoviy ishlov berilgan 22,5 ming dollarni pora tariqasida olayotgan paytda qo‘lga olingan.
Mazkur holat yuzasidan A.X. va S.T.ga nisbatan Jinoyat kodeksining 168-moddasi (firibgarlik) va 28-moddasi (jinoyat ishtirokchilarining turlari), 211-modda (pora berish) bilan jinoyat ishi qo‘zg‘atilgan. Tergov harakatlari olib borilmoqda.
Izoh (0)