Porsche компанияси электромобилда энг узоқ дрифтни амалга ошириб жаҳон рекордини ўрнатди. Хоккенхаймрингдаги Porsche Experience ўқув-машғулот марказида марка инструктори Деннис Ретера орқа узатмали Taycan электрокарида узлуксиз дрифтда 210 айланани амалга оширган, деб хабар беради Motor.
Дрифт махсус тайёрланган пойга трассасида бўлиб ўтган. 80 метрли динамометрик майдонга сув сепилган, маршрут бўйлаб ва бурилишларга GPS, шунингдек, машина томининг марказий қисмига камера ўрнатилган. Натижаларни тасдиқлаш учун немис ўқув-машғулот марказига Гиннеснинг рекордлар китоби расмий вакиллари, шунингдек, дрифт бўйича икки карра Европа чемпиони Денис Рисманн ҳам ташриф буюрган.
Дрифт учун немис мутахассислари орқа ўқли битта электромоторга эга олд серияли Porsche Taycan’дан фойдаланган. Компания электрокарнинг техник тавсифига оид маълумотлар билан бўлишмаган. Базавий жамланмадаги моделга 408 от кучига эга электромотор ва сиғими 79,2 киловатт/соатли аккумулятор батареялари ўрнатилади.
Электрокарни тажрибали дрифтчи Деннис Ретер бошқарган. Пойгачи узлуксиз бошқарувда 210 та айланани амалга оширган. Спортчи 55 дақиқада жами 42 171 метрни босиб ўтган. Porsche Taycan’нинг ўртача тезлиги соатига 46 километрни ташкил этган. Ҳайдовчининг сўзларига кўра, ҳаракат аввалида у атайлаб барқарорлаштирувчи барча тизимларни ўчириб қўйган ва «подвеска» ҳамда рул бошқарувини ўзига мослаштириб олган. Натижада спортчи бутун ҳаракат давомида электромобилни тўлиқ бошқара олган.
Мавзуга доир: Видео: Mercedes компанияси янги челленж доирасида асфальтга Audi’нинг тўртта ҳалқасини «чизди»
Изоҳ (0)