1900-yilning 22-noyabrida ilk Mercedes taqdim etilgan. Dunyoga mashhur avtomobil markasi paydo bo‘lganiga 120 yil to‘lishi munosabati bilan “Kommersant” ushbu avtomobil kompaniyasi tarixiga oid ma’lumotlarni to‘plab taqdim etdi.
35HP modeli Mercedes’ning ilk avtomobiliga aylangan. U muhandis-konstruktor Vilgelm Maybax tomonidan avstriyalik tadbirkor Emil Yellinek buyurtmasiga asosan yaratilgan va aynan uning qizi sharafiga nomlangan. Avtomobil ustidagi ishlar 1900-yilning noyabrida yakunlangan. U 35 ot kuchiga ega dvigatel, uzun g‘ildiraklar bazasi, po‘lat kuzovga ega bo‘lgan. Barqarorlik yaxshi ta’minlanishi uchun og‘irlik markazi pastga yo‘naltirilgan.
1902-yilda Daimler Motoren Gesellschaft kompaniyasi yangi modelni — Mercedes Simplex’ni taqdim etgan. Afsonalarga ko‘ra, 1903-yilda Vilgelm Maybaxning (rulda o‘tirgan) shaxsan o‘zi avtomobilni Germaniya imperatori Vilgelm II ga namoyish etgan. U esa o‘z hayratini yashirmagan holda “Ha, avtomobilingiz ajoyib… Shunga qaramay men otga ishonaman. Avtomobil — bu shunchaki vaqtinchalik hodisa”, degan.
Mercedes-Benz firmasiga katta mashhurlik 1927-yildan boshlab S (Sport) seriyasiga kiruvchi avtomobillar ishlab chiqarila boshlanganidan keyin kelgan. Ular ko‘plab musobaqalarda rekord o‘rnatgan. Kompressor dvigateller oddiy rejimda 120 ot kuchi, yoqilganida esa 180 ot kuchini taqdim etgan. S seriyasi Ferdinand Porshe o‘zining shaxsiy firmasini yaratishdan oldin Mercedes’da yaratgan so‘nggi ishi hisoblanadi.
Mercedes-Benz 770 — 1930-yildan 1943-yilga qadar ishlab chiqarilgan premium-sinfga oid avtomobil. Uni yuqori martabali natsist amaldorlarining Ikkinchi jahon urushidan oldin va keyingi arxiv suratlarida uchratish mumkin. O‘z vaqtida ushbu avtomobildan yapon imperatori Xiroxito, Rim papasi, reyxsprezident Paul fon Gindenburg, Adolf Gitler, German Gering, Vilgelm II foydalangan.
Mercedes-Benz W136 1936-yildan 1953-yilga kompaniyaning eng ko‘p sotilgan avtomobiliga aylangan. Ushbu mashina o‘zidan oldingi ajdodidan arzonroq va zamonaviyroq bo‘lgan. Urush boshlanguniga qadar 75 ming nusxaga yaqin ishlab chiqarilgan bo‘lsa, 1947-yili ishlab chiqarish qayta boshlangach esa 83 mingdan ortiq.
Mercedes-Benz W198 (300SL) — kompaniyaning urushdan keyin ishlab chiqargan birinchi sport avtomobili hisoblanadi. Uni yaratish g‘oyasi amerikalik diler Maks Xoffmanga tegishli bo‘lib, u AQShning boy qatlami tezyurar avtomobillarga qiziqish bildirayotganini payqab qolgan. Avvaliga mashina ikki o‘rindiqli kupe kuzovida ishlab chiqarilgan, 1957-yilda esa ochiq versiyasi — rodster paydo bo‘lgan.
Mercedes-Benz W114 / W115 — 1968-yildan 1976-yilga qadar haqiqatda ommaviy seriyada ishlab chiqarilgan biznes-klassga kiruvchi avtomobil. Uning dizaynini fransiyalik dizayner Pol Brak yaratgan. Kompaniya jami shu turdagi avtomobildan 1,9 million nusxa ishlab chiqargan.
G-klass esa Mercedes-Benz kompaniyasi aksioneri hisoblangan Eron podshohi Muhammad Rizo Pahlaviyning taklifiga binoan harbiy transport vositasi sifatida yaratilgan. Avtomobilning fuqarolarga mo‘ljallangan versiyasi 1979-yilda taqdim etilgan. G-klass o‘nlab yillardan beri qolgan sinfdagi avtomobillardan farqli o‘laroq tashqi ko‘rinishini o‘zgartirmay kelmoqda.
Mercedes-Benz W116 — 1972-yilning sentabridan 1980-yilga qadar ishlab chiqarilgan seriya. Ushbu avtomobil kompaniya tomonidan S-Class deb nom qo‘yilgan birinchi model hisoblanadi. Bunga qadar sedan kuzoviga ega modellar norasmiy ravishda “S” tijoriy indeksiga ega bo‘lgan.
A-Class’ga kiruvchi ilk avlod 1997-yili Frankfurt avtosalonida taqdim etilgan. W168 kompaniya mahsulotlari orasidagi noodatiy modelga aylangan: kalta kuzovidan tashqari avtomobil old yetakchi g‘ildiraklar bilan jihozlangan. A-Class’ga kiruvchi modellar asosan Yevropa, Yaponiya va Rossiyada sotilgan.
1990-yillar afsonasi — Mercedes-Benz 600 SEL. W140 modelining taqdimoti 1991-yili Jeneva avtosalonida bo‘lib o‘tgan. U ko‘plab yangiliklarni o‘zida jamlagan: aerodinamik korpusdan tashqari avtomobil ikkitalik oynaga, avtomatik ravishda yopiladigan eshiklar va yukxona, iqlimni nazorat qilish tizimiga ega bo‘lgan.
Mercedes-Benz yengil avtomobillardan tashqari furgonlar, yuk mashinalari va avtobuslar ishlab chiqaradi.
Mercedes jamoasi “Formula-1” poygalarida ham ishtirok etib keladi. Daimler-Benz konserni 1954-yilgi seriyada muvaffaqiyatli ishtirok etgan. Biroq 1955-yilda kompaniya seriyani tark etgan va 1990- hamda 2000-yillarda motor yetkazib berganiga qaramay, 2009-yilning noyabrigacha zavod jamoasi sifatida ishtirok etmagan. Mercedes — yetti karra Instruktorlar kubogi sohibi (2014, 2015, 2016, 2017, 2018, 2019 va 2020).
2020-yil 19-noyabr kuni Mercedes-Benz o‘zining so‘nggi modeli — Maybach S-Class’ni taqdim etdi. Avtomobilning texnik tavsifi hozircha oshkor etilmagan. Sedan faqat to‘liq uzatmali va 9 pog‘onali uzatmalar qutisiga ega versiyada taqdim etiladi.
Izoh (0)