Shota Arveladze: Mavsum bu qadar qiyin o‘tishini hech kim kutmagandi. “Paxtakor”ning barcha a’zolari oldida shlyapamni yechaman

“Paxtakor” bosh murabbiyi Shota Arveladze Coca-Cola Superliga 23-turi doirasida “Qo‘qon-1912”ga qarshi kechgan o‘yindan (2:1) keyin o‘z fikrlari bilan o‘rtoqlashdi. Ushbu bahs oldidan “sherlar” chempionlik masalasini hal qilib qo‘ygandi.

Birinchi galda gapni uzoqdan boshlamoqchiman. “Paxtakor“ bu mavsumda o‘zining ilk rasmiy uchrashuvini 10-fevral kuni o‘tkazdi. Bu paytda hali chempionat bahslari boshlanmagan edi. Ushbu mavsum bunday og‘ir va qiyin o‘tishini hech kim kutmagandi. Jamoamizdagi barchaga, butun O‘zbekiston xalqiga, muxlislarga minnatdorchilik bildiraman. Qiyin davrni boshimizdan o‘tkazdik, bunga o‘zim guvoh bo‘ldim. Bu kunni alohida qayd etib o‘tish joiz. “Paxtakor“ 13-bor O‘zbekiston chempioni bo‘ldi. Jamoa avval ham ko‘p bor chempionatda g‘olib chiqqan, lekin bunday og‘ir va qiyin mavsum kam bo‘lgan. Barcha oilasi bilan birgalikda kasallandi: ayrimlarning ayoli, onasi, otasi... yana ba’zilar yaqinlarini yo‘qotdi. Mashaqqatli mavsum yakunida jamoadagi har bir shaxs oldida shlyapamni yechaman. Erta tongdan to kechqurunga qadar hamma yordam berdi. Rahbariyat bir daqiqaga bo‘lsa-da, e’tiborsiz qoldirmadi. O‘FA va PFLga ham katta rahmat aytib qolaman. Ha, biz katta farq bilan chempion bo‘ldik. Futbolchilarni ham og‘ir mavsumdagi chempionlik bilan tabriklayman va rahmat aytaman. Oldinda uchta o‘yin qolganini, biz o‘z darajamizda to‘p tepishimizni ta’kidlagan bo‘lardim va kubokda ham oxirigacha kurashib g‘olib bo‘lishni istaymiz. Muxlislar bizdan g‘alaba kutadi. OChLda garchi uzoqqa bora olmagan bo‘lsak-da, bunga juda yaqin keldik. Eslash alamli, albatta. Chunki ajoyib sport formasida edik. Jamoa oldida vaqt ko‘p, OChLda g‘olib chiqish uchun fursat yetarli. Klublarga, qo‘llab-quvvatlagan barchaga tashakkur izhor qilmoqchiman. Ha, xatolar, kamchiliklar kuzatildi. Muhimi oldinga qarab intilish va rivojlanish kerak.

Futbolchilarga rahmat aytmaslikka haqqim yo‘q. Biz ayrim pallalarda tushunarsiz kunlarni o‘tkazdik. Futbolchi buxgalter emas, uning jismoniy, ruhiy tayyorgarligi muhim. Yana bir bor futbolchilar, klub xodimlari, rahbariyat oldida shlyapamni yechaman.

Men uchun hamma yaxshi harakat qildi. Har bir futbolchi qiyin o‘yinda ishtirok etdi. Chempionatdagi eng qiyin o‘yin borasida yaxshilab o‘ylab ko‘rish kerak. OKMK bilan 0:2 hisobida ortda borayotib, yakunda 2:2 natijasini qayd etdik. “Bunyodkor“ bilan oxirgi o‘yin qiyin o‘tdi. Jizzaxda “So‘g‘diyona“ga 0:1 hisobida mag‘lub bo‘ldik. Bu borada yana bir bor o‘ylab ko‘rish lozim.

Shota Arveladze, “Paxtakor” bosh murabbiyi

“Paxtakor” mavsum tugashiga 3 tur qolganda chempionlik masalasini hal qildi. Bu jamoa uchun O‘zbekiston chempionati tarixidagi 13-g‘oliblik bo‘ldi. Arveladze shogirdlari Osiyo Chempionlar Ligasining 2020-yilgi mavsumida chorak finalga qadar yetib bordi.