Qashqadaryodagi terimchi oila 38 kun paxta terib, 41 million so‘m daromad qildi

Qashqadaryo viloyatining Koson tumanida yashovchi Jumayevlar oilasi 38 kun paxta terib, 41 million 80 ming so‘m daromad qildi. Bu haqda “Daryo”ga Koson tuman hokimligi axborot xizmati rahbari Dilshod Nabiyev xabar berdi.

Ta’kidlanishicha, Koson tumanining “Gulbog‘” mahallasida yashovchi Azamat Jumayev paxta terimida besh nafar oila a’zosi bilan birga shuncha daromadga erishgan.

“Bir kunda 1 million 200 ming so‘m ba’zan 1 million 300 ming so‘mdan pul topyapmiz. Terimda o‘zimdan tashqari, xotinim, ikki nafar o‘g‘lim, qizim va kelinim ham menga ko‘maklashdi”, — deydi oila boshlig‘i Azamat Jumayev.

Azamat Jumayev terimdan topgan daromadiga katta o‘g‘li uchun uy-joy qurishni, kelinining o‘qishi uchun kontrakt pulini to‘lashni maqsad qilgan.

“Koson tumani “Gulbog‘” mahallasidan to‘rtta oila oilaviy terim ishlarida qatnashib, yaxshi daromad topmoqda, — deydi 81-terim otryadiga biriktirilgan mas’ul Gavhar Jumayeva. — Bular Jumayev Azamat, Jumayev Furqat, Ergashev Izatulla, Karomatov Zohid kabi fuqarolarimizning oila a’zolaridir”.

Viloyat hokimligining qo‘shimcha qilishicha, mazkur oila daromadi haqida eshitgan viloyat hokimi Zoir Mirzayev Jumayevlar oilasiga rahmat aytib, mehnatkash oila uchun o‘zining maxsus sovg‘asi borligini ma’lum qilgan.

Shuningdek, hokim mazkur oilani namuna qilib ko‘rsatgan Koson tuman hokimligi axborot xizmatiga minnatdorlik bildirgan.